Qazaqstandyq tennısshiler Hıýstondaǵy týrnırdiń fınalyna shyǵa almady

ASTANA. QazAqparat – Qazaqstandyqtar Andreı Golýbev pen Aleksandr Nedovesov juptyq synda AQSh-ta topyraq tósenishinde ótip jatqan Hıýston ATP 250 týrnıriniń fınalyna shyǵa almady, dep habarlaıdy QazAqparat tilshisi.

Qazaqstandyq jup jartylaı fınalda aýstralııalyqtar Maks Persell – Djordan Tompsonmen kúsh synasty.

Eki set te taı-breıkpen aıaqtalyp, onda aýstralııalyq dýet sáttirek oınady – 7:6 (8:6), 7:6 (7:5).

Eki saǵatqa jýyq ýaqytqa sozylǵan tartysty báseke barysynda qazaqstandyqtar 1 eıspen birge 6 breık-poınttyń ekeýin paıdalandy. Qarsylastary 5 eıs, 2 breıkpen (4 breık-poınt) kózge tústi.

Aýstralııalyq jup sońǵy matchta ulybrıtanııalyqtar Djýlıan Kesh – Enrı Pattenmen bas júldeni sarapqa salady.

Eske sala keteıik, budan buryn qazaqstandyq tennısshilerdiń AQSh-taǵy jarystyń jartylaı fınalyna shyqqanyn jazǵan bolatynbyz.