Qazaqstandyq tennısshiler AQSh-taǵy jarystyń jartylaı fınalyna shyqty

ASTANA. QazAqparat – Qazaqstandyqtar Andreı Golýbev pen Aleksandr Nedovesov AQSh-ta topyraq tósenishinde ótip jatqan Hıýston ATP 250 týrnıriniń jartylaı fınalyna shyqty, dep habarlaıdy QazAqparat tilshisi.

Qazaqstandyq jup shırek fınalda jarystyń 4-raketkalary bolyp tirkelgen shvetsııalyq Andre Goransson – japonııalyq Ben Maklahlanmen sheberlik baıqasty.

Qazaqstandyq jup eki sette 6:4, 6:4 esebimen jeńiske jetti.

Bir saǵat 14 mınýtqa sozylǵan báseke barysynda A.Golýbev pen A.Nedovesov 1 eıs jasap, 6 breık-poınttyń ekeýin paıdalandy.

Shvetsııalyq-japonııalyq jup 2 eıspen ǵana kózge tústi.

Qazaqstandyq tennısshilerdiń jartylaı fınaldaǵy qarsylastary keıin anyqtalady.

Eske sala keteıik, budan buryn qazaqstandyq tennısshilerdiń AQSh-taǵy jarystyń shırek fınalyna ótkenin jazǵan bolatynbyz.

Sondaı-aq Aleksandr Býblıktiń Monte-Karlo masters týrnırindegi qarsylasy anyqtaldy.