Qazaqstandyq tennısshi Ulybrıtanııadaǵy týrnırdiń fınalyna shyqty

ASTANA. QazAqparat – Qazaqstannyń juptyq syndaǵy birinshi, álemniń 53-raketkasy Aleksandr Nedovesov Ilklı (Ulybrıtanııa) chellendjer týrnıriniń fınalyna shyqty, dep habarlaıdy QazAqparat tilshisi.

Jarystyń birinshi raketkasy bolyp tirkelgen A.Nedovesov pen ekvadorlyq Gonsalo Eskobar áýeli aýstralııalyqtar Endrıý Harrıs – Lıýk Sevıldi 6:2, 6:4 esebimen tize búktirdi.

Qazaqstandyq-ekvadorlyq dýet shırek fınalda germanııalyqtar Konstantın Frantsen – Hendrık Iebenspen sheberlik baıqasty.

A.Nedovesov – G.Eskobar 6:4, 3:6, 10:4 esebimen jeńdi.

Aleksandr men Gonsalo jartylaı fınalda belgııalyqtar Zızý Bergs – Iorıs de Loremen kezdesti.

Birinshi partııada belgııalyq jup taı-breıkte sátti oınady – 7:6 (7:3).

Ekinshi sette esep 5:5 bolǵan mezette qazaqstandyq-ekvadorlyq jup breık jasap, sosyn óz geımderin aldy – 7:5. Sodan keıin sýper taı-breıkte múmkindikterin jibergen joq – 10:5.

Eki saǵatqa jýyq ýaqytqa sozylǵan tartysty báseke barysynda A.Nedovesov – G.Eskobar 5 eıs jasap, 7 breık-poınttyń bireýin paıdalandy.

Aleksandr Nedovesov pen Gonsalo Eskobar fınalda dodanyń 3-raketkalary, amerıkalyq Robert Gelloýeı – aýstralııalyq Djon Patrık Smıtpen bas júldeni sarapqa salady.

Qazaqstannyń áıelder arasynda juptyq syndaǵy birinshi, álemniń 24-raketkasy Anna Danılına Berlın WTA 500 týrnıriniń jartylaı fınalyna shyǵa almady.

Qazaqstandyq-qytaılyq jup shırek fınalda chehııalyqtar Katerına Sınıakova – Marketa Vondrýsovaǵa ese jiberdi – 6:3, 5:7, 7:10.

Eske sala keteıik, budan buryn Anna Danılınanyń juptyq synda Berlın týrnıriniń shırek fınalyna ótkenin jazǵan bolatynbyz.

Sondaı-aq Aleksandr Býblık Germanııadaǵy jarystyń shırek fınalyna shyqty.