Qazaqstandyq teńiz porttarynyń júk qabyldaý múmkindigi jylyna 20 mln. tonnaǵa deıin jetkiziledi

ASTANA. QazAqparat - Qazaqstandyq teńiz porttarynyń júk qabyldaý múmkindigi 2020 jylǵa qaraı jylyna 20 mln. tonnaǵa deıin jetkiziledi. Bul týraly búgin ótken «Sý kóligindegi qaýipsizdikti qamtamasyz etýdiń mańyzdy máseleleri» atty halyqaralyq ǵylymı-tájirıbelik konferentsııada QR Investıtsııalar jáne damý mınıstrliginiń Kólik komıtetiniń tóraǵasy Áset Asaýbaev aıtty.

Onyń aıtýynsha, Aqtaý portynda qosymsha termınaldar salý jáne Quryq portynda sal keshenin salý arqyly Kaspıı teńizinen tasymaldanatyn júkterdiń mólsherin kóbeıtý boıynsha birqatar jumystar atqarylýda.

«Aqtaý portynyń júk ótkizý áleýetin kúsheıtý úshin taǵy úsh qurǵaq júk termınaldarynyń qurylysy júrgizilýde. Bul óz kezeginde qurǵaq júkterdi qabyldaý múmkindigin 3 mln. tonnaǵa deıin kóbeıtedi. Al Quryq portynda qýattylyǵy 4 mln. tonnaǵa deıin jetetin sal keshenin salý josparlanǵan», - dep atap ótti Á. Asaýbaev.

Onyń aıtýynsha, osyndaı sharalardy oryndaǵannan keıin Kaspııdegi qazaqstandyq porttardyń qýattylyǵy 2020 jylǵa qaraı jylyna 20 mln. tonnaǵa deıin jetedi.