Qazaqstandyq teleserıaldar Ońtústik-Shyǵys Azııada tanymal
«Shyn máninde, memlekettik jáne jeke telearnalardaǵy baǵdarlamalar men serıaldardyń sapasy edáýir jaqsaryp keledi. Mundaǵy mańyzdy kórsetkishterdiń biri - qazaqstandyq kontentti sheteldik teleradıokompanııalar satyp ala bastady. Atap aıtqanda, Ońtústik-Shyǵys Azııada praım-taım ýaqytyna «Qazaqstan» ulttyq arnasy túsirgen «Áke» serıaly qoıylǵan, Qytaı halyqtyq televıdenıesinde, Malaızııada, Sıngapýrde jáne Indonezııada qazaqstandyq serıaldar kórsetiledi. Bul otandyq televızııalyq ónimdi qazaqstandyq kórermender ǵana emes, sheteldikterdiń de baǵalaı bastady degen sóz. Bul úlken aýdıtorııa jáne shetelde kórsetý quqyǵyn satý arqyly el bıýdjetine qosymsha tabys túsedi», - dedi QR Aqparat jáne kommýnıkatsııalar vıtse-mınıstri Alan Ájibaev QR Parlamenti Senatynyń áleýmettik mádenı damý jáne ǵylym komıtetiniń keńeıtilgen otyrysynda.
Otyrys barysynda «Aqparat jáne kommýnıkatsııalar boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasyn talqylaýda.
Eske sala ketsek, zań jobasynyń negizgi baǵyty BAQ-tyń damýyna sapaly zańnamalyq negiz qalyptastyrý bolatyn. Atap aıtqanda, ákimshilik júktemeni tómendetý men sanktsııalarmen qamtamasyz etýdi júıeleý maqsatynda bolmashy quqyqbuzýshylyqtar úshin tırajdy tárkileý men BAQ qyzmetin ýaqytsha toqtatý jazalaryn alyp tastaý josparlanýda.
BAQ-ty jalǵan aqparat taratý jaýapkershiliginen bosatý negizdemeleriniń tizimi keńeıtiledi. BAQ úshin azamat kelisimi qajet etilmeıtin jaǵdaılar anyqtaldy - máselen jappaı mádenı, sporttyq-buqaralyq jáne ózge de qoǵamdyq jıyndarda azamattyń fotosýretin jarııalaýda jáne t.b.
Qazaqstandyq kontentti ári qaraı damytý aıasynda memlekettik organdar men uıymdardaǵy qoǵamdyq kórsetilimderde tek qana otandyq telearnalardy kórsetý josparlanýda. Zań jobasynda «Tsıfrly Qazaqstan» baǵdarlamasyn tabysty júzege asyrýǵa jáne memlekettik aqparattyq júıelerdi jobalaý, qurý jáne taldaý protsesterin jetildirýge baǵyttalǵan normalar usynyldy.
Odan bólek, uıaly baılanys operatorlaryna radıojıilik spektrlerin birlesip qoldaný quqyǵyn berý arqyly baılanys qyzmetiniń sapasyn arttyrý da kózdelip otyr.
Talqylaýdan keıin komıtet zań jobasyn palatanyń plenarlyq otyrysyna engizý týraly sheshim qabyldady.