Qazaqstandyq telearnalar áleýmettik jarnamany tegin kórsetetin bolady

ASTANA. QazAqparat - QR Ulttyq ekonomıka mınıstrligi tele jáne radıoarnalarǵa áleýmettik jarnamany tegin kórsetý mindetin zańnamalyq turǵyda bekitýdi usynyp otyr, dep xabarlaıdy QazAqparat.

Mundaı normalar jarnama máseleleri boıynsha keıbir zańnamalyq aktilerge ózgertýler men tolyqtyrýlar engizý týraly zań jobasynda qarastyryp otyr.

"Zań jobasy tele, radıoarnalarǵa aılyq taratylym kóleminiń 1%-nan kem emes (táýligine 14,4 mınýt) bolatyn áleýmettik jarnamany tegin translıatsııalaý mindetin engizýde", - dedi Ulttyq ekonomıka vıtse-mınıstri Aıdar Arıfxanov QR Parlamenti Májilisinde atalmysh zań jobasyn tanystyrý kezinde.

Bul talapty oryndaýǵa mindetti telearnalarǵa:  Qazaqstan, Habar, Habar 24, Balapan, Bilim jáne mádenıet, Qazsport, Eýrazııa Birinshi arnasy, Astana, KTK, Mır, NTK, 31 Arna, 7 Arna, STV, Almaty arnalary jatqyzylyp otyr.

Rolıkterdi ornalastyrýshy quzyrly organ QR Aqparat jáne kommýnıkatsııalar mınıstrligi bolmaq.

Zań jobasynyń tanystyrylymyna qatysýshylar osyǵan qatysty óz usynystaryn aıtty.

"Mysaly, bizde táýligine 19 saǵattyq shyǵarylym bolady. Biz keshe sanap shyqtyq, 30 sekýndtyq rolıkti kúnine 23 ret taratýymyz kerek eken. Jeke menshik kanaldar úshin bul múmkin emes. Tym kóp. Bizde usynys - taratylym kóleminen emes, jarnamalyq ýaqyttyń 1 paıyzyna sáıkes keletin kólemdi alaıyq. Sol kezde kúnine 4-5 ret áleýmettik rolıkterdi kórsetiledi", - dep atap ótti "Astana" telearnasynyń bas dırektory Lázzat Tanysbaı.

Sonymen qatar zań jobasy boıynsha, jarnamalardaǵy taýardyń baǵasyn tek teńgede kórsetý týraly talap qarastyrylyp otyr. Sondaı-aq bıologııalyq belsendi qospalardy jarnamalaý talaptaryn buzýǵa qatysty jaýapkershilik te  qatańdatylmaq.