Qazaqstandyq taýarlardyń qaptamasyn jasaýǵa memleket kómektesedi
Bul týraly «Qazaqstan qaptaýshylar qaýymdastyǵy» zańdy tulǵalar birlestiginiń tóraǵasy Batyrbek Áýbákirov málimdedi.
Qaptaýshylar qaýymdastyǵy bazasynda ónerkásiptik dızaın men qaptamalyq sheshimder ortalyǵyn ashamyz. Osylaısha, QR Indýstrııa jáne ınfraqurylymdyq damý mınıstrligimen birlesip, qazaqstandyq taýarlardyń rebrendıngine basymdyq beremiz dep oılaımyn. Máselen, «Rahat» kompanııasy jylyna 3 mıllıard teńgege qaptama satyp alady jáne óz taýaryn shetelge tabysty eksporttap jatyr. Bizdiń oıymyzsha, ózge zaýyttardyń da áleýeti zor jáne olardyń anaǵurlym sapaly ári jańa qaptamaǵa aýysýyna kómektesý qajet», - dedi B. Áýbákirov elordada ótken «Tsellıýloza-qaǵaz ónerkásibi men qaptama ındýstrııasyn damytý» forýmynda.
Onyń aıtýynsha, memleket jańa qaptama shyǵyndaryn óteýge kómektese alady.
«Máselen, joǵary sapaly qaptama mıllıon teńgege baǵalansa, memleket onyń 800 myń teńgesin óteıdi. Qalǵan 200 myń teńgeni kásipker tóleıdi. Ázirge Úkimetpen keńesip jatyrmyz. Shamamen 1 qyrkúıekte Úkimetke aqparat jiberip, kelesi jylǵy bıýdjetten qarajat qarastyra beremiz. Kez kelgen kásipker óz taýaryn Qytaıǵa, Reseıge, Ózbekstanǵa eksporttaǵysy kelse, sol óńirlerge tán qaptama jasaýdy eskerýi qajet. Bul úshin biz kómektesýge ázirmiz», - dedi Batyrbek Áýbákirov.