Qazaqstandyq taýarlardy Tájikstan naryǵyna shyǵarýdyń jańa arnasy ashyldy

ASTANA. QazAqparat - Qazaqstannyń syrtqy saýda palatasy otandyq taýarlardy Tájikstan naryǵyna shyǵarýdyń jańa joldaryn ashty. Osyǵan baılanysty endi Aqmola astyǵy, Aqtóbe uny men makarondary, Qyzylordanyń kúrishi, Qostanaı konfetteri, sonymen qatar, Taraz tsementi Tájikstanǵa eksporttalatyn bolady. Qazaqstan syrtqy saýda palatasy uıymdastyrǵan Dýshanbe qalasyndaǵy otandyq saýda-ekonomıkalyq mıssııasynyń nátıjesinde osyǵan qol jetkizildi.

QR Syrtqy saýda palatasynyń basqarma tóraǵasy Meıirbek Májıtovtyń aıtýynsha, mıssııa barysynda tájik bıznesi qazaqstandyq kompanııalarǵa qyzyǵýshylyq bildirdi. «Sapar aıasyndaǵy iskerlik kelissózder barysynda «Novoaldjanskıı melkombınat» JShS, «Agner» JShS, «Yntymaq» AQ jáne «Nur-Qas LTD» JShS ózderiniń ónimderine tikeleı satyp alýshylarmen kelisim jasady. Kelisimsharttyń jalpy somasy 4 mln dollardan asady. Osyǵan oraı, alǵashqy eksporttyq jetkizilimder osy aıda júzege asyrylady dep josparlanǵan», - deıdi Meıirbek Májıtov.

Budan bólek, sapar aıasynda Qazaqstannyń Tájikstandaǵy Tótenshe jáne Ókiletti elshisi Aǵybaı Smaǵulov pen «Qazkommertsbank» AQ-nyń basshylarynyń qatysýymen brıfıng ótti. Onda delegatsııa qatysýshylaryna ónimderdi jetkizý máseleleri túsindirilip, Tájikstan tarapynan jasalatyn qoldaýlar týraly konsýltatsııalar berilgen.

«Mıssıa barysyndaǵy erekshe oqıǵanyń biri - Dýshanbe qalasynda Ortalyq Azııadaǵy eń úlken gıpermarkettiń iske qosylýy aıasyndaǵy tájik kompanııalarymen kezdesýler boldy. Bunda qazaqstandyq taýar óndirýshiler saýda jelilerine óz ónimderin tanystyryp, aldaǵy ýaqytta kelisimsharttar jasasýǵa negiz qalady. Aıta keterligi, saýda jelilerine qazirdiń ózinde 12 myńnan astam taýarlyq pozıtsııalar qajet etiletini anyqtaldy. Aldaǵy ýaqytta tájik kompanııalary 5 gıpermarket pen 20 sýpermarket jelilerin iske qosyp, Qyrǵyzstan men Ózbekstanda ókildikter ashpaq. Sondyqtan da, geografııalyq yńǵaıly ornalasýy men taýarlarynyń sapasy jaǵynan qazaqstandyq taýar óndirýshiler úshin Tájikstan arqyly Ortalyq Azııa naryǵyna ótýge zor múmkindikter týady dep oılaımyz. Osyǵan baılanysty otandyq taýar óndirýshilerdi ózderiniń qyzmetterin jandandyryp, múmkindikterdi paıdalanýǵa shaqyramyz», - deıdi palata basshysy.