Qazaqstandyq stýdentterdiń joǵary áleýeti bizdi qýantady - QFÝ ókili

QAZAN. QazAqparat - Qazaqstan Respýblıkasy Prezıdenti Nursultan Nazarbaevtyń Tatarstanǵa sapary eki respýblıka arasyndaǵy yntymaqtastyqtyń joǵary deńgeıde ekenin kórsetedi, deıdi Qazan federaldyq ýnıversıteti fızıka ınstıtýtynyń bilim berý qyzmeti jónindegi dırektory Oleg Nedopekın.

«Qazaqstan Prezıdentiniń Tatarstanǵa sapary eki respýblıka arasyndaǵy yntymaqtastyqtyń joǵary deńgeıde ekenin kórsetedi. Sapar aıasynda Nursultan Nazarbaevtyń bizdiń ýnıversıtetke at basyn burǵany erekshe qýantady», - deıdi QFÝ ókili.

N. Nazarbaev pen R. Mınnıhanov tilge tıek etken bilim salasyndaǵy yntymaqtastyq týraly aıta kele, O. Nedopekın qazaqstandyq stýdentterdiń joǵary daıarlyq deńgeıin atap kórsetti.

«Respýblıkalar arasyndaǵy yntymaqtastyqty odan ári damytýdy qalaımyz. Óıtkeni qazaqstandyq stýdentterdiń áleýetiniń joǵary ekendigi bizdi qýantady. Aldaǵy ýaqytta Qazaqstan joǵary oqý oryndarymen yqpaldastyq joǵary deńgeıge jetedi degen úmittemiz», - dedi ol.