Qazaqstandyq stýdentter Italııaǵa vıza rásimdeı almaı júr – SІM sebebin túsindirdi
«1963 jylǵy «Konsýldyq qatynastar týraly» Vena konventsııasyna sáıkes, shet memleketterdiń ulttyq vızalaryn resimdeý máseleleri árbir eldiń ishki zańnamasymen retteledi jáne árbir memlekettiń aıryqsha quzyreti bolyp sanalady. Ulttyq vızalardy resimdeý jónindegi qujattar osy memlekettiń quzyretti organdarymen qaralady jáne kelisiledi. Sondaı-aq Shengen keńistigi memleketteriniń biryńǵaı bazasy arqyly óńdeledi. Halyqaralyq tájirıbege sáıkes, shet memlekettiń vıza berýden bas tartatyn konsýldyq mekemesi ótinish berýshige jáne úshinshi tulǵalarǵa bas tartý sebebin habarlamaýǵa da quqyly», - dedi Aıbek Smadııarov vedomstvonyń baspasóz qyzmeti alańynda ótken brıfıngide.
Onyń atap ótýinshe, qazirgi ýaqytta Qazaqstanda akkredıttelgen birqatar sheteldik dıplomatııalyq ókildik vızalardy resimdeý jáne berýdi óz elderinde COVID-19-ǵa baılanysty engizilgen karantındik is-sharalardy eskere otyryp qaraıdy.
«Jalpy, Italııa Elshiliginiń konsýldyq bólimi kóshi-qon erejeleriniń qatańdatylýyn eskere otyryp, Italııanyń kóshi-qon qyzmetterimen birge stýdentterdiń 22 qujattan turatyn árbir ótinimin muqııat tekserýge májbúr. Al bul ótinishterdi óńdeý protsesine áserin tıgizedi. Osyǵan baılanysty stýdentterge vıza alý úshin qujattardy erterek tapsyrý qajettigine nazar aýdaramyz.
Sonymen qatar, bul másele QR SІM basshylyǵynyń baqylaýynda ekenin habarlaımyz. Qazaqstandaǵy Italııa elshisimen jáne konsýlymen tıisti kezdesýler ótkizildi. Olardyń aqparaty boıynsha, vıza berýdi keshiktirýdiń negizgi sebebi sońǵy aılarda kelip túsken ótinishter sanynyń artýy bolyp otyr. Aı saıyn konsýldyq bólim 3 myńǵa jýyq vızany óńdeıdi jáne beredi. Italııalyq dıplomattar bul máseleni sheship, vıza rásimdeıtin qyzmetkerler sanyn 2 esege kóbeıttik dep sendirdi», - dedi ol.