Qazaqstandyq stýdentter álemdik AKT-baıqaýynda jeńiske jetti

ASTANA. QazAqparat - Qazaqstandyq stýdentter Huawei ICT Competition aqparattyq-kommýnıkatsııalyq tehnologııalar baıqaýynyń álemdik fınalynyń jeńimpazdary atandy. Shenchjen qalasynda ótken baıqaýdyń qorytyndy kezeńinde Qazaqstannan 2 komanda qatysty: HATÝ, Ál-Farabı atyndaǵy QazUÝ jáne Ǵumarbek Dáýkeev atyndaǵy AEjBÝ stýdentteriniń komandasy Network Track baǵytynda birinshi oryndy, al Ǵumarbek Dáýkeev atyndaǵy AEjBÝ stýdentteriniń komandasy Cloud Track baǵytynda úshinshi oryndy ıelendi, dep habarlaıdy QazAqparat.

«74 eldiń ishinen Qazaqstan degende búl esten ketpes sát boldy. Jeńiske jetý úshin biz kóp daıyndaldyq, bar kúshimizdi saldyq. Árıne, tapsyrmalar óte qıyn boldy, biraq biz barlyq bilimimizdi qoldanýǵa tyrystyq», - dep bólisti Huawei ICT Competition fınalynda birinshi oryn alǵan komandanyń stýdenti Aıda Begaıdarova.

Huawei ICT Competition 2015 jyldan beri ótkizilip keledi. Qazirgi jetinshi baıqaýǵa álemniń 74 eli men aımaǵynan 2000 ýnıversıtet pen kolledjden 120 000-nan astam stýdent qatysty. 146 komanda, 36 el men aımaqtan 429 stýdent ulttyq jáne aımaqtyq jarystardan keıin jahandyq fınalǵa qatysý úshin Qytaıǵa bardy. Olardyń kópshiligi - ýnıversıtetterde ashylǵan Huawei AKT akademııalarynyń músheleri. Bilim berý jobasy jyl saıyn 200 000 adamdy oqytady jáne stýdentter sanyn 5 ese kóbeıtýdi josparlap otyr.

Memleket Basshysy Qasym-Jomart Toqaevtyń 2025 jylǵa qaraı 100 myń qazaqstandyq IT-mamandardy daıarlaý strategııasy sheńberinde Huawei Technologies Kazakhstan tehnıkalyq mamandandyrý stýdentterin daıarlaý jáne otandyq kadrlardy qoldaý úshin búkil Qazaqstan boıynsha AKT-Akademııalar jelisin damytýda.

«Jahandyq jarystarǵa qatysý úshin óte aýqymdy materıaldy bilý kerek: ol degenimiz bultty tehnologııalar, úlken derekterdi óńdeý jáne jasandy ıntellekt», - dep atap ótti Huawei AKT akademııasynyń bapkeri Vıktor Taılakov.

AKT salasyndaǵy Huawei baıqaýy búkil álem boıynsha AKT Akademııasyna túskisi keletin Huawei akademııalary men joǵary oqý oryndarynyń stýdentterine baǵyttalǵan. Baıqaý arqyly Huawei stýdentterge básekelestik pen ıdeıalarmen bólisý platformasyn usynýǵa umtylady, osylaısha olardyń AKT salasyndaǵy bilimi men praktıkalyq daǵdylaryn keńeıtedi, sonymen qatar jańa tehnologııalar men platformalardy paıdalaný arqyly ınnovatsııalarǵa degen qabiletterin arttyrady.

«Akademııalarǵa jáne baıqaýǵa qatysý barlyǵyna tolyǵymen tegin. Biz úshin eń aldymen mamandardy daıarlaý mańyzdy. Ekinshiden, ár el tsıfrlyq ekonomıkany qurýda. Bul úshin tehnıkalyq daǵdylar qajet. Osy baıqaý arqyly biz ár el men aımaq úshin bilikti kadrlar daıyndaǵymyz keledi», - dep atap ótti Huawei EBG Jahandyq seriktestikter men satylymdardy damytý departamentiniń prezıdenti Sıao Haıtszıýn.