Qazaqstandyq sportshylar Phenchhanǵa qazy-qarta ala keldi - Elsııar Qanaǵatov
- Elsııar Baımuhameduly, erteń resmı ashylatyn aıtýly dodaǵa sportshylarymyz qanshalyqty daıyn?
- Barlyǵy jospar boıynsha júrip jatyr. Sportshylarymyz Phenchhandaǵy Olımpıadanyń eki qalashyǵyna bólinip ornalasty. Ústińgi qalashyqta shańǵy jáne shana sporty túrleriniń sportshylary, bıatlon, frıstaıl men mogýlshylar jaıǵassa, tómengi qalashyqqa short-trekshiler, konkıshiler, mánerlep syrǵanaýshylar ornalasty. Búgingi tańda ár sportshy ózderi synǵa túsetin alańdarda erkin jattyǵyp, koreıalyq alańdarmen tanysyp úlgerdi. Negizinen qurama jarysqa saqadaı daıyn dep aıta alamyz.
- Sportshylarymyz tolyǵymen kelip boldy ma?
- Bir-eki sport túrinen synǵa túsetin sportshylarymyz ǵana qaldy. Frıstaıl-akrobatıkadan jáne mánerlep syrǵanaýdan eki qyzymyz kelgen joq. Olar jarys kestesine sáıkes, saıystar jaqyndaǵanda keledi. Al Denıs Ten Seýlde, ol sol jaqta júrip sońǵy jattyǵýyn jasap jatyr.
- Sportshylardyń Phenchhan aýa raıyna, jer jaǵdaıyna, jergilikti tamaqtarǵa úırenisýi qalaı?
- Jalpy alǵanda bizge bul jerdiń aýa raıy tańsyq emes. Saryarqanyń aıazynan kelgen sportshylarymyz myndaǵy salqyn aýa raıyna eleńdep júrgen joq. Eń bastysy, jarys kezinde boran bolmasa bolǵany. Dál búgingideı ańyrap jel soǵyp tursa, shańǵyshy, bıatlonshylarǵa qıyndaý soǵýy múmkin. Biraq, jarysqa bizdiń sportshylar ǵana shyqpaıdy ǵoı. Boran soqsa bárine birdeı soǵady. Sondyqtan kóppen birge kóremiz. Tamaqtaryna keletin bolsaq, sportshylar arasynda ózderimen birge qazy-qarta alyp kelgenderi bar. Arasynda sony jeıdi. Áıtse de Olımpıada qalashyǵynyń taǵamdary da jaman emes eken. Unap jatyr. Halal tamaq ta jetkilikti eken.
- Sportshylardyń jattyǵý jumystary kóńilderińizden shyǵady ma?
- Árıne, biz olarǵa barlyq jaǵdaıdy jasadyq. Belgilengen kestege sáıkes jattyǵady, tamaqtanady, demalady. Bárin baqylaýda ustap otyrmyz. Ornalasqan jerleri de taza, retti, jyly. Bizdiń shtabtyń mindeti - sportshylarǵa jaǵdaı jasaý, ýaqytynda aqparat berý, qonaqúı men stadıondar arasynda tasý, jınalys ótkizip, tapsyrma berý.
- Bul dodada kimderge úmit arta alamyz?
- Shańǵy sportynan, frıstaıl, mogýldan sportshylarymyz osyǵan deıingi álem kýboktarynda óte jaqsy nátıjelerge qol jetkizdi. Olımpıadada da osy sport túrlerinen júlde kútemiz. Basqa da sport túrlerinen jeńimpazdar bolmaıdy dep kesip aıtpaý kerek. Bálkim biz boljamaǵan júldelerge de ilinip qalarmyz. Short-trekshilerimiz de óte jaqsy óner kórsetip júr. Qazir anaý-mynaý dep attaryn atap, tústerin tústemeı-aq qoıaıyq. Jalpy kóp másele sportshylardyń baǵyna baılanysty. Joǵaryda atap ótkenimdeı, biz sportshylarǵa barlyq jaǵdaıdy jasadyq. Endi, olardyń isi - júlde alý, júldeger ataný.
- Sportshylardy qosa eseptegende, Olımpıadada qazaqstandyq delegatsııada qansha adam bar?
- Jalpy sany 150-ge jýyq. Olardyń qatarynda akkredıtatsııasy joq arnaıy alyp kelgen adamdarymyz bar. Biz olardy qalaǵa arnaıy kelisimmen kirgizip otyrmyz.
- Ol qandaı mamandar, ne isteıdi?
- Jarys bolǵan jerde neshe túrli jaǵdaı da bolýy múmkin ǵoı. Sol úshin arnaıy dárigerler, massaj jasaýshylar, psıhologtardy alyp keldik. Oǵan qosa shańǵyshylarymyzdyń aıaǵyna shańǵyny baılap beretin, maılaıtyn kómekshiler bar.
- Jarys kezinde sportshylarymyzǵa qoldaý kórsetetin arnaıy jankúıerler bolady ma?
- Biz, ıaǵnı Qazaqstan Ulttyq Olımpıada komıteti týrıstik kompanııamen kelisimshart jasasqan bolatynbyz. Olar osy Olımpıadaǵa jankúıerlerdi mindetti túrde ákeledi. Jarysta jankúıerlerimiz mindetti túrde bolady.
- Áńgimeńizge rahmet!