Qazaqstandyq sportshylar Qytaıdaǵy jarysta aza tutý belgisin taǵyp shyqty
«Sochı Olımpıadasynyń qola júldegeri, mánerlep syrǵanaýshy Denıs Tenniń mezgilsiz qazasy búkil álem halqyn aýyr qaıǵyǵa dýshar etti. Talantty sportshy, aıaýly ul, namysty otandasymyzdyń qazasyna baılanysty el sportshylary ózderi qatysyp jatqan týrnırlerge aza tutý belgisin taǵyp shyqpaq. Qytaıdyń Ýsı qalasyndaǵy semserlesýden álem chempıonatyna qatysyp jatqan qazaqstandyq noıandar jarysqa aza tutý belgisin taǵyp shyqty», - dedi QR Ulttyq olımpıadalyq komıtetiniń baspasóz qyzmetinde.
Sondaı-aq atap ótilgendeı, elimizdegi barlyq sporttyq federatsııalar ótkizetin resmı ári resmı emes týrnırler bir mınýttyq únsizdikpen bastalady.
Aıta keteıik, keshe Qazaqstan premer-lıgasynda óner kórsetetin «Qaırat» jáne «Tobyl» klýbtary matchtaǵy jeńisin Denıs Tenniń rýhyna arnady.
Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraıynda ótedi. Bastalýy - saǵat 10:00-de. Sondaı-aq bir mezgildegi qoshtasý rásimi 21 shilde kúni Astanada qalasyndaǵy "Barys-Arena" stadıonynda ótedi.