Qazaqstandyq sport kıimderi «ZIBROO» brendimen Reseıge eksporttalady - 7 mln eýroǵa kelisimshart jasaldy

ASTANA. 6 maýsym. QazAqparat - Otandyq sport kıimderin shyǵarýshy - «KazSPO-N» kompanııasy «ZIBROO» brendimen óz ónimderin Reseıge shyǵarý jóninde jalpy somasy 7 mıllıon eýroǵa uzaq merzimdi kelisimshart jasady. Bul týraly «Kaznex Invest» AQ baspasóz qyzmeti habarlaıdy.

Kelisimshartqa Reseı aýmaǵynda kásibı sport múkammalyn satýǵa jáne kerek-jaraqpen qamtamasyz etýge mamandandyrylǵan Shańǵy kerek-jaraqpen qamtamasyz etý ortalyǵymen (Máskeý) qol qoıyldy. Eksporttyq kelisimshartqa 2014 jylǵy Sochıdegi qysqy olımpıada oıyndarynyń qarsańynda uıymdastyrylǵan qysqy sport oıyndary túrleri, týrızm jáne belsendi demalý boıynsha 9-shy Halyqaralyq kongresinde qol qoıyldy. Bul is-sharada «KazSPO-N» kompanııasy «Kaznex Invest» agenttiginiń qarjylyq jáne uıymdastyrýshylyq qoldaýymen áleýetti satyp alýshylarǵa óz sport jáne taý shańǵysy kıimderiniń jańa toptamasyn usyndy.

Shańǵy kerek-jaraqpen qamtamasyz etý ortalyǵymen ýaǵdalastyqqa sáıkes osy jyldyń sońyna deıin jalpy somasy 600 myń eýroǵa Reseıdiń 10 aımaǵyna - Máskeý, Qazan, Ijevsk, Syktyvkar, Tıýmen, Petrozavodsk, Ýhta, Týla, Kırov, Cherepovets, sondaı-aq, Belorýssııaǵa «ZIBROO» otandyq brendimen kıim jetkiziledi dep kútilýde. 2014 jyly eksport kólemi 1,2 mıllıon eýrony quraıdy, al satý jelisi Reseıdiń 15 aımaǵyna deıin keńeıedi, 2018 jyly bul kórsetkishter 5 mıllıon eýrony quraıdy jáne 20 aımaqqa taraıdy.