Qazaqstandyq sheber súıekten buıym jasaýdan halyqaralyq saıysta jeńimpaz boldy

NUR-SULTAN. QazAqparat – Qazaqstandyq sheber Bektas Kárim Reseıde ótken súıekten buıym jasaýdan halyqaralyq jarysta úzdik atandy, dep habarlaıdy QazAqparat.

«Álem halqynyń súıek kesý óneri» atty halyqaralyq festıval Reseıdiń Magadan qalasynda ótti.

Súıekten túrli buıymdar jasaý baıqaýyna AQSh, Kanada, Norvegııa, Qytaı, Shvetsııa, Qazaqstan, Fınlıandııa, Belarýs, Ýkraına, Reseı jáne taǵy basqa elderden sheberler qatysqan.

Barlyǵy 40 shaqty usta ózara baq synady.

Sol saıysta otandasymyz, Aqmola oblysy Shortandy aýdanynyń Mádenıet jáne tilderdi damytý bólimi janyndaǵy «Oıyn-saýyq ortalyǵynyń» sýretshisi Bektas Kárim «Ónerdegi rýhanııat» nomınatsııasy boıynsha І dárejeli dıplommen marapattaldy.

Súıek sheberi buǵan deıin AQSh, Ózbekstan, Mońǵolııada ótken kórmelerge qatysyp, atalǵan sala boıynsha ótken sharalardan júldeli oryndarǵa ıe bolǵan.