Qazaqstandyq shahmatshylar dúnıejúzilik onlaın olımpıadaǵa qatysyp jatyr
Shilde aıynyń birinshi jartysynda Halyqaralyq shahmat federatsııasy (FIDE) tarıhta tuńǵysh ret shahmattan dúnıejúzilik olımpıadanyń onlaın formatta ótkiziletinin habarlady. Oıyndar 2020 jyldyń 22 shildesinen 30 tamyzyna deıin ótedi.
Onlaın Olımpıada 2020 - FIDE uıymyna múshe elderdiń ulttyq quramalary arasyndaǵy jalpy komandalyq jarys.
Jarys chess.com oıyn alańynda uıymdastyrylady jáne eki negizgi kezeńnen turady: «Dıvızıondar» jáne «Pleı-off». Oǵan 163 ulttyq qurama komanda jáne álemniń 1500-den astam úzdik shahmatshysy qatysady.
Ár komanda quramynda alty negizgi jáne alty rezervtik oıynshy, sonymen qatar komanda kapıtanynan turady. Birinshi qadamnan bastap ár júriske 15 mınýt + 5 sekýnd beriledi.
Nona Gaprındashvılı kýbogynyń kórsetkishterine sáıkes, 2018 jyly Batýmı qalasynda ótken sońǵy olımpıadanyń nátıjesi boıynsha, onlaın Olımpıadanyń «Joǵarǵy dıvızıon» qataryna álemniń 5 úzdik ulttyq quramasy (Úndistan, Qytaı, Reseı, Ýkraına, AQSh), tórt kontınentten 5 úmitker komanda men irikteý kezeńinen ótken 15 komanda engizildi.
Azııanyń shahmat federatsııasy Qazaqstan quramasyn Joǵarǵy dıvızıonǵa usyndy, bul topta bizdiń shahmatshylar 21-23 tamyz aralyǵynda álemdegi eń myqty komandalarmen kúsh synasady. Joǵary dıvızıonnyń 40 komandasy 4 topqa bólinip, árqaısysynda aınalma týrnıri ótkiziledi. Ár toptan úzdik úshtik: irikteý kezeńinen, shırek fınaldan, jartylaı fınaldan jáne fınaldan turatyn Pleı-off kezeńine ótedi.
Onlaın-olımpıadaǵa Qazaqstannyń erler quramasynan halyqaralyq grossmeısterler Rınat Jumabaev, Murtas Qajǵaleev, Rýstam Hýsnýtdınov jáne Anýar Ismaǵambetov, halyqaralyq sport sheberi Denıs Mahnev jáne FIDE sheberi Ramazan Jalmahanov qatysady.
Elimizdiń áıelder quramasynan halyqaralyq áıelder grossmeısterleri Jansaıa Ábdimálik, Bıbisara Asaýbaeva, Gúlishan Nahbaeva jáne Gúlmıra Dáýletova, áıelder arasyndaǵy halyqaralyq sport sheberi Ásel Serikbaı jáne áıelder arasyndaǵy FIDE sheberi Merýert Kamalıdenova qatysady.
Komanda kapıtany – halyqaralyq grossmeıster Pavel Kotsýr.
Bizdiń komandanyń eń jaqyn qarsylastary - Ázerbaıjan, Vengrııa, Ońtústik Afrıka Respýblıkasy, Ýkraına, Slovakııa, Ispanııa, Norvegııa, Frantsııa jáne Nıderland.
Jarystyń birinshi kúni, 21 tamyzda Qazaqstan quramasy Slovakııa, Nıderland (top-grossmeıster Anısh Gırı jetekshilik etetin) jáne Ispanııa komandalaryna qarsy oınaıdy.
Jarystyń translıatsııasy týrnırdiń Olymp.FIDE.com veb-saıtynda, álemniń barlyq tanymal tilderinde júrgiziledi.