Qazaqstandyq senatorlar Ózbekstandaǵy saılaý barysyn baqylady

TAShKENT. QazAqparat - Qazaqstandyq senatorlar Erbolat Muqaev jáne Ǵumar Dúısembaev TMD PAA jáne EQYU PA mıssııasynyń quramynda Ózbekstandaǵy saılaýdy baıqaýǵa qatysty. Bul jóninde Senattyń baspasóz qyzmetine silteme jasap QazAqparat habarlaıdy.

TMD PAA-ǵa qatysýshy jeti memleket parlamentteriniń atynan TMD PAA-nyń baıqaýshy 38 ókili Ózbekstan Respýblıkasy Olıı Májilisi Zań shyǵarý palatasyna saılaý monıtorıngin ótkizdi. TMD PAA-nyń baıqaýshylary okrýgtik 3 saılaý komıssııasynda jáne 145 saılaý ýchaskesinde boldy.

Monıtorıng qorytyndysy boıynsha TMD PAA baıqaýshylary Ózbekstannyń saılaý zańnamasy elde demokratııalyq saılaý ótkizý jáne saılaý úderisine barlyq qatysýshylardyń quqyqtary saqtalýy úshin qajetti barlyq jaǵdaıdy qamtamasyz etkeni týraly qorytyndy jasady.

Monıtorıng júrgizilgen daýys berý oryndarynyń basym kópshiliginde qoǵamdyq uıymdar men saıası partııalardyń jáne kandıdattardyń senimdi ókilderi, sondaı-aq halyqaralyq monıtorıng ótkizý mıssııalarynyń músheleri qatysty. TMD PAA baıqaýshylary áńgime kezinde saılaýdy uıymdastyrý men ótkizý barysynda mańyzdy eskertýler joq ekenin aıtty.

Eske sala keteıik, biz Ózbekstandaǵy parlament saılaýynyń nátıjesin jarııalaǵan bolatynbyz.