Qazaqstandyq saılaýshylardyń quqyqtyq saýaty jetilip keledi - Zańgerler odaǵy
«Úsh myńǵa jýyq zańgerler Qazaqstannyń 17 óńirindegi saılaý ýchaskelerinde boldy. Óńirlik ókilderdiń aldyn ala baǵamdaýy boıynsha, Qazaqstan Prezıdenttigine saılaý barlyq zańnamaǵa sáıkes júrgizildi», - dedi S. Aqylbaı «Zańgerler ádil saılaý úshin» qoǵamdyq birlestiginiń baspasóz brıfınginde.
Onyń aıtýynsha, kezekten tys saılaý ótkizý týraly habarlanǵan sátten beri qoǵamdyq birlestik saılaýshylardy tolǵandyrǵan eń ózekti máseleler boıynsha bes aqparattyq bıýlleten taratqan.
«Bizdiń uıym barlyq saılaýǵa qatysady. Uıymnyń basty mindeti - saılaý komıssııasynyń qyzmetin baǵalaý emes, konsýltatsııalyq kómek kórsetý. Saılaýshylardy quqyqtyq turǵyda aǵartýshylyqpen aınalysamyz. Eger saılaýshy óz quqyqtary men mindetterin jaqsy bilse, saılaý ádil ári ashyq ótedi. Saılaý protsesinde barlyq kedergiler daýys berýshilerdiń óz quqyǵyn bilmeýinen týyndaıdy. Sondyqtan ınternetten jáne qoǵamnan eń ózekti suraqtardy iriktep alyp, 5 baspasóz máslıhatyn ótkizdik», - dep atap ótti odaq basshysy.
Spıker ótken jyldarmen salystyrǵanda saılaýshylardyń quqyqtyq saýatynyń jaqsarǵanyn jáne belsendirek bola túskenin jetkizdi.
«Muny áleýmettik jeliler men qoıylatyn suraqtardan baıqaýǵa bolady. Keıde ózimiz tyǵyryqqa tirelip qalatyn suraqtar kezdesedi. Bul bizdiń quqyqtyq memleketke qaraı kele jatqanymyzdy bildiredi. Saılaý qoǵamnyń qanshalyqty damyǵanyn kórsetetin protsess», - dedi Serik Aqylbaı.