Qazaqstandyq sarbazdar Halyqaralyq armııa oıyndarynda taǵy da jeńiske jetti

NUR-SULTAN. QazAqparat - Qazaqstandyq áskerı topograftar, artıllerıster men mergender Halyqaralyq armııa oıyndarynda top jardy, dep habarlaıdy QazAqparat.

QR Qorǵanys mınıstrligi baspasóz qyzmetiniń habarlaýynsha, Qazaqstandyq jaýyngerler Halyqaralyq armııa oıyndary ótip jatqan polıgondarynda ózderiniń kásibı sheberligin kórsetip, saıystar ári qaraı qyzyqty órbýde.

Aqmola oblysynyń Şýchınsk qalasyndaǵy «Amandyq» polıgonynda «Merıdıan» saıysyna qatysýshylar ekinshi «Azımýt» kezeńiniń jattyǵýyn oryndady. Aýdany 12 sharshy shaqyrym aýdannyń ortasha qıylysqan jeri boıynsha qozǵala otyryp, segiz eldiń áskerı topograftary berilgen baǵyttar men taktıkalyq tapsyrmada kórsetilgen baqylaý núkteleri boıynsha ótti.

Topogeodezııalyq eseptoptardyń saıysynda 41 mınýt 53 sekýndta jeńiske jetken Qazaqstan komandasy boldy. Saıysty ekinshi bolyp Qytaı áskerı qyzmetshileri – 46 mınýt 36 sekýnd, úshinshi – Belarýs 49 mınýt 26 sekýnd ýaqyt kórsetkishimen aıaqtady.

Qaraǵandy oblysynyń «Spassk» oqý-jattyǵý polıgonynda «Taktıkalyq mergen» jarysynyń «Jaýynger ekeý» dep atalatyn ekinshi kezeńi ótti. Áskerı qyzmetshiler ǵımaratty shartty qarsylastan azat etý tapsyrmalaryn oryndady.

– Atalǵan jattyǵýdy oryndaý kezinde oqys oqıǵalardy boldyrmaý úshin tóreshiler ǵımarat ishindegi atqyshtardyń janynda bolyp, qaýipsizdik tehnıkasynyń saqtalýyn baqylaıdy. Munda jaýyngerler birge jumys isteı otyryp, ekeýi de barynsha muqııat jáne saq bolýy kerek, – dedi saıystyń tóreshisi maıor Ǵalym Sadyqov.

Kásibı sheberliktiń, jyldam jáne úılesimdi is-qımyldyń arqasynda Qazaqstan komandasy jeńiske jetti. Ekinshi orynda Qytaıdyń áskerı atqyshtary, úshinshi orynda – Ózbekstan.

Jambyl oblysyndaǵy «Gvardeısk» polıgonynda «Artıllerııadan oq atý sheberleri» saıysynda mınaatqysh eseptoptarynyń ekinshi kezeńinen keıin, ıaǵnı jeke jarys pen túngi sprınt nátıjeleri boıynsha Qazaqstannyń áskerı qyzmetshileri kósh bastap keledi. Ekinshi orynda Reseı komandasy, úshinshi orynda – Ázerbaıjan.

Ázerbaıjan Respýblıkasynyń aýmaǵyndaǵy teńiz polıgonynda ótip jatqan «Teńiz kýbogy» saıysynyń ekinshi kezeńi ótti. Áskerı teńizshiler teńiz nysanalaryna artıllerııadan oq atty. Jattyǵýlardy oryndaý nátıjeleri boıynsha qazaqstandyq teńizshiler 87 upaımen ekinshi orynǵa taban tiredi, al, birinshi oryndy 90 upaı alǵan reseılik jáne ázerbaıjandyq áskerı qyzmetshiler ózara bólisti.

Osyǵan deıin Halyqaralyq armııa oıyndarynda tankısterdiń ekinshi ekıpajy jeńiske jetkenin habarlaǵan edik.