Qazaqstandyq Paralımpıada chempıony týraly ne bilemiz

ALMATY. QazAqparat - Qazaqstan quramasy Phenchhanda ótip jatqan qysqy Paralımpıada oıyndarynyń beıresmı jalpykomandalyq kestesinde 17-orynda tur, dep habarlaıdy QazAqparat tilshisi.

Shańǵyshy Aleksandr Kolıadınniń klassıkalyq ádispen 1,5 shaqyrymdyq sprınterlik jarysta jeńip alǵan altyn medali Qazaqstandy 17-orynǵa shyǵardy. Tizimniń basynda 8 altyn, 6 kúmis, 6 qola medalmen AQSh quramasy tur. Qazirge deıin 22 eldiń paralımpıadashylary medal jeńip aldy. Jarystar 18 naýryzǵa deıin jalǵasady.

Qazaqstandyq paralımpıada chempıony buǵan deıin 2014 jylǵy Paralımpıadaǵa da qatysqany belgili, biraq onda júlde jeńe almaǵan bolatyn.

Qostanaılyq 45 jastaǵy Aleksandr Kolıadın LW4 synybynda óner kórsetedi. 1997 jyly ol qaıǵyly oqıǵaǵa ushyrap, 3-top múgedegi bolyp qalǵan soń, aıaǵyna protez salyndy. Taǵdyrdyń taýqymetine moıymaǵan jigerli sportshy 2013 jyly shańǵy jarysymen barynsha shuǵyldana bastaıdy. 2014 jyldan beri Vasılıı Kolomıetstiń qolastynda jattyǵyp keledi.

Avtokran basqarýshysy mamandyǵyna ıe, shańǵy jarysy boıynsha Qazaqstan Respýblıkasynyń sport sheberi.