Qazaqstandyq ónerpazdar Bosnııa jáne Gertsegovınada óner kórsetti

ShYMKENT. QazAqparat - Túrkııa Respýblıkasynyń Kastamoný qalasyna «Kastamoný-Túrki áleminiń mádenı astanasy» jyly jáne Naýryznama merekesine Qazaqstannyń atynan Ońtústik Qazaqstan oblysynyń bir top óner maıtalmandary attanǵan edi. Túrkitildes elder basqosqan aıtýly shara Bosnııa jáne Gertsegovına federatsııasynyń Zenıtsa, Saraevo jane Mostar kalalarynda, Chernogorııanyń Chentındje qalasynda jalǵasyn tapty, dep habarlaıdy QazAqparat tilshisi.

Atalǵan elderdegi mádenı sharalarda TÚRKSOI Halyqaralyq uıymyna múshe memleketterdiń 70-ten asa ónerpazdary qatysýda. Olardyń arasynda ońtústiktiń  «Qazyna» bı ansambli men  «Semser» toby óner kórsetip, tili men dini tamyrlas elderdiń myzǵymas dostyǵyn dáripteýde. Sonymen qatar, qazaqstandyq delegattardyń ishinde oblystyq mádenıet jáne tilderdi damytý basqarmasynyń ókilderi de bar. Qazaq ánin áýeletip, san syrly bıimen uly ónerdi ulyqtaǵan mádenıet qyzmetkerleriniń sapary endi Albanııa memleketinde de jalǵasyn tabady dep kútilýde.

Aıta keteıik, «Qazyna» bı ansambli  2017 jyly Túrkııanyń Býrsa qalasynda ótken 31-shi halyqaralyq «Altyn Qarakóz» folklorlyq bı baıqaýynyń bas júlde ıegeri atanǵan bolatyn. Al, «Semser» toby respýblıkalyq baıqaýlardyń laýreaty sanalady.