Qazaqstandyq óndirýshiler bıyl 100 myń kólik qurastyrady
QR Indýstrııa jáne ınfraqurylymdyq damý mınıstrliginiń málimetinshe, 2019 jyly Qazaqstanda avtomobıl ónerkásibinde 359,5 mlrd teńgege 50 447 kólik shyǵarylyp, naqty kólem ındeksi 162,5% qurady. Barlyq jańa tehnıkanyń jartysy eń iri avtokóndirýshi «SaryarqaAvtoProm» kásipornynda shyǵaryldy. Ótken jyly Qostanaı zaýyty óndiristi eki esege arttyryp, jalpy 25 802 jeńil, júk kóligi jáne avtobýstar shyǵardy. Al bıyl óndiris kólemin 51 400 birlikke deıin jetkizýdi josparlap otyr.
Ónimdilik ólshemi boıynsha qazaqstandyq «AZIıA AVTO» avtoqurastyrý zaýyty da kóshbasshyǵa aınaldy. Ótken jyl qorytyndysy boıynsha zaýytta 20 myń arnaýly tehnıka shyǵaryldy. Bıylǵy jospar boıynsha kásiporynda 44 myń tehnıka shyǵarylýy tıis.
Aýyl sharýashylyǵy mashınalaryn jasaý sektorynda 2018 jyldan bastap óndiris ósimi baıqalady. Oǵan ónimdi ótkizý kezinde qosymsha qun salyǵyn tóleýden bosatý sııaqty memlekettik qoldaý sharalary yqpal etti. Ótken jyly 41,2 mlrd teńgege aýyl sharýashylyǵy mashınalary jasalyp, ósim 144% quraǵan. Otandyq óndiris tehnıkasy egin jınaý naýqany barysynda joǵary suranysqa ıe bolyp otyr.
«Onyń ónimdiligi, toraptary men agregattarynyń sapasyna mehanızatorlardyń aıtatyn shaǵymy joq», - dedi mınıstrlikten..
2019 jyly aýyl sharýashylyǵy mashınalaryn jasaý salasynda 1200-den asa traktor shyǵaryldy. Mysaly, Qostanaıdaǵy aýylsharýashylyq tehnıkasyn óndirýshi «Agromashholdıng KZ» 130-dan astam Lovol traktoryn jáne 355 «Essil» kombaınyn shyǵardy. 2020 jyldyń І toqsanynda kásiporyn 62 traktor jáne 20 kombaın óndirdi.
Sondaı-aq, qazirgi ýaqytta temirjol mashına jasaý klasteri belsendi damyp keledi. Zaýyttarda shyǵarylatyn ónim jelisin jańǵyrtý jáne keńeıtý jumystary júrgizilýde. Onyń ishinde «Tulpar-Talgo» JShS zaýytynda byltyr 91 jolaýshy vagony óndirildi. «Lokomotıv qurastyrý zaýyty» AQ TE33A serııaly 11 magıstraldyq teplovoz shyǵardy.
«Jalpy bıyl avtoónerkásip óniminiń jalpy kólemin 100 myń tehnıkaǵa deıin jetkizý josparlanyp otyr. Onyń 10-15 myńy — Reseı, Qyrǵyzstan, Ózbekstan, Tájikstan, Belarýs, Ázerbaıjan jáne basqa elderge eksporttalmaq. Búginde avtomobıl salasyn damytý múmkindikteri óte mol. 2019 jyly maýsym aıynda mashına jasaýdy damytý jónindegi 2019-2024 jyldarǵa arnalǵan Jol kartasy bekitildi. Ol mashına jasaýdyń barlyq kishi salalaryn jáne qoldaý sharalary jónindegi is-sharalar keshenin qamtıdy. Bul salyqtyq preferentsııalar, qarjylyq jáne shıkizattyq qoldaý, bilikti kadrlarmen qamtamasyz etý jáne taǵy basqalar», - delingen mınıstrlik aqparatynda.