Qazaqstandyq olımpıadashylar «Rıo-2016»-ǵa daıyndyq jıyndaryn Brazılııada ótkizedi

ASTANA. QazAqparat - Qazaqstandyq olımpıadashy-sportshylar Rıo-de-Janeıro qalasynda ótetin jazǵy Oıyndarǵa qatysady. Oǵan daıyndyq jıyndaryn sportshylar Brazılııada ótkizedi. Bul týraly búgin Sporttyq jekpe-jek jáne kúsh qoldanylatyn sport túrleri konfederatsııasynyń tóraǵasy Tımýr Qulybaev aıtty.

"Bizdiń barlyq jumysymyz Rıo-de-Janeıroda ótetin Olımpıada oıyndaryna daıyndyqqa arnalatyn bolady. Sportshylarymyz jergilikti aýa raıyna úırenýleri úshin daıyndyq jıyndaryn Brazılııada ótkizemiz. Óıtkeni kez kelgen sportshynyń nátıjesi onyń daıyndyǵyna tikeleı baılanysty. Biz Mádenıet jáne sport mınıstrligimen tyǵyz baılanys ornatqanbyz. Bizdiń barlyq federatsııalarymyzdyń nazaryn osyǵan aýdarǵym keledi", - dep atap ótti ol búgin ótken jyl saıynǵy Konfederatsııa músheleriniń jıynynda.

Sondaı-aq onyń aıtýynsha, konfederatsııa bıylǵy jyldy "Sporttyq medıtsınany damytý jáne dopıngpen kúres jyly" dep jarııalaǵan. Sondyqtan tóraǵa ulttyq quramalardyń keshendik ǵylymı tekseristen ótkizip otyrýdy qamtamasyz etýdi tapsyrdy.

Ata keteıik, 2016 jylǵy Olımpıada oıyndary Brazılııanyń Rıo-de-Janeıro qalasynda 5-21 tamyz aralyǵynda ótedi.