Qazaqstandyq oqýshylar Jenevada robototehnıkadan ótken jarysta rekord ornatty

ASTANA. QazAqparat - Qazaqstandyq oqýshylar Jenevada robototehnıkadan ótken FIRST GLOBAL CHALLENGE álem jarysynda jeńiske jetip, rekord ornatty. Bul týraly Oqý-aǵartý mınıstri Ashat Aımaǵambetov jelidegi paraqshasynda jazdy, dep habarlaıdy QazAqparat.

Qazaqstannan barǵan oqýshylar 167 eldiń jasóspirimderimen synǵa túsip, eń kóp upaı jınady. Bul robototehnıka chempıonaty - álemdegi eń bedeldi jarystardyń biri. Jeńis oqýshylarǵa álemniń jetekshi ýnıversıtetterine túsýge múmkindik beredi.

«Elimizdiń namysyn ulttyq qurama atynan 15 pen 17 jas aralyǵyndaǵy 5 oqýshy qorǵady. Olardyń barlyǵy FIRST Global Challenge ulttyq týrnıriniń jeńimpazdary. Oqýshylarymyz 3 kún ishinde 16 oıyn ótkizip, eshqaısysynan jeńilmeı, upaı sany boıynsha rekord ornatty. Chempıonattaǵy birinshi orynnan bólek, qazaqstandyq komanda basqa elderdiń komandalaryna kórsetken «Aıryqsha qoldaýy úshin» Al-Khwarizmi altyn medalin, sondaı-aq robotty jasaýdaǵy tamasha ınjenerlik sheshimderi úshin JUDGES AWARD arnaıy syılyǵyn jeńip aldy. Oqýshylarymyzdy jetken jetistikterimen quttyqtaımyn!», - dep jazdy mınıstr.

Sondaı-aq mınıstr jyl saıyn IT-mektepter sany kóbeıe beretindigi týraly aıtty.

Foto: t.me/aimagambetov