Qazaqstandyq oqýshylar Qyrymǵa ketken: Oqý-aǵartý mınıstrligi túsinikteme berdi

ASTANA. QazAqparat – Oqý-aǵartý mınıstrligi qazaqstandyq oqýshylardyń Qyrymǵa saparyna qatysty túsinikteme berdi, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide BAQ ókili qazaqstandyq oqýshylardyń shetelge sapary qalaı qadaǵalanatynyn surady. Bul rette jýrnalıst «Rossotrýdınstvo» ókildiginiń baǵdarlamasy boıynsha oqýshylardyń Qyrymǵa jasaǵan saparyn mysalǵa keltirdi.

«Ata-analardyń bilim berý uıymymen baılanyspaı, balalaryn óz betinshe jibergen. Biz kún saıyn balalarmen baılanystamyz. 28 mamyrda olardyń oralýyn asyǵa kútemiz. Búgingi tańda olardyń ómiri men densaýlyǵy, emotsıonaldy jaǵdaıy jaqsy. Óıtkeni, olarmen birge ata-analary bar. Oqýshylar bólim boıynsha jıyntyq baǵalaý jáne toqsandyq jıyntyq baǵalaý emtıhandaryn belgilengen keste sheńberinde tapsyra alady. Sondyqtan bul oqý protsesine jáne qorytyndy baǵa alýǵa áser etpeıdi», - dep túsindirdi Balalardyń quqyqtaryn qorǵaý komıtetiniń basshysy Nasyjan Ospanova.

Sondaı-aq, spıker balalarmen qandaı da bir saparǵa shyqpas buryn baratyn aımaqty zerttep, qaýipsizdik talaptaryn qatań saqtaýdy eskertti.

«Biz bul aımaqtaǵy jaǵdaıdyń óte shıelenisti ekenin túsinemiz. Sondyqtan ár baǵyt týraly oılaný kerek. Ásirese balalardyń saıahatyna qatysty nemquraılyq tanytýǵa bolmaıdy. Ol balalar kelgennen keıin ata-analarymen áńgime júrgizetin bolamyz», - dep túıindedi Nasyjan Ospanova.