Qazaqstandyq oqýshylar Eýropa olımpıadasynda úzdik nátıje kórsetti

NUR-SULTAN. QazAqparat – Qazaqstandyq oqýshylar alǵash ret ınformatıkadan Eýropalyq jasóspirimder olımpıadasyna (European Junior Olympiad in Informatics) qatysyp, jaqsy nátıje kórsetti, dep habarlaıdy QazAqparat tilshisi BǴM baspasóz qyzmetine silteme jasap.

Bıyl Olımpıadaǵa 27 memleketten 90-nan astam oqýshy qatysqan. Qazaqstannyń qurama komanda músheleri ulttyq jarystar qorytyndysy boıynsha anyqtalǵan bolatyn. Osylaısha qazaqstandyq qurama komanda músheleri – ınformatıka páni boıynsha respýblıkalyq olımpıada jeńimpazdary men júldegerleri eýropalyq saıysqa qatysty.

«Olımpıada qorytyndysy boıynsha qazaqstandyq oqýshylar jaqsy nátıje kórsetip, joǵary marapatqa ıe boldy. Atap aıtsaq, Van Lı altyn medal (Almaty qalasyndaǵy RFMM), Taımas Korǵanbaev kúmis medal (Almaty qalasyndaǵy № 165 mektep-lıtseıi), Ádil Sultanov qola medal (Atyraý qalasyndaǵy oblystyq mamandandyrylǵan «Bilim - Innovatsııa» lıtseıi), Ramazan Perdebaı – qola medal (Karaǵandy qalasyndaǵy N. Nurmaqov atyndaǵy mamandandyrylǵan mektep-ınternaty ıelendi», - dep habarlaıdy mınıstrlikten.

Bıyl European Junior Olympiad Informatics (EJOI) uıymdastyrý komıteti olımpıadany onlaın rejımde ótkizý týraly sheshim qabyldaǵan bolatyn.