Qazaqstandyq oqýshylar Baıqońyrǵa joldama aldy

BAIQOŃYR. QazAqparat – «Baıqońyr» ǵarysh kesheninde jumys saparymen júrgen QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ǵarysh aılaǵynan kemeniń ushyrylýyn baqylaýǵa kelgen qazaqstandyq oqýshylarmen kezdesti, dep habarlaıdy QazAqparat tilshisi.

Ǵarysh kemesiniń ushyrylýyn kórý jáne mınıstrmen kezdesý múmkindigi on bir qazaqstandyq oqýshyǵa buıyrǵan. Olardyń barlyǵy – tehnıkalyq ǵylymdar boıynsha respýblıkalyq olımpıadalardyń jeńimpazdary.

Belgili bolǵandaı, mınıstrlikke tehnıkalyq daryndy balalardy aty ańyzǵa aınalǵan «Baıqońyr» ǵarysh aılaǵyna saıahattaýǵa yntalandyrý týraly usynysty Balalar quqyqtary jónindegi ýákil Arýjan Saıyn bildirgen. Bul bastama qoldaýǵa ıe bolyp, balalar ǵarysh kemesiniń ushyrylǵanyn kórip qana qoımaı, mınıstr Baǵdat Mýsın, ǵaryshker Aıdyn Aıymbetov, Qazaqstan Respýblıkasy Prezıdentiniń «Baıqońyr» keshenindegi arnaıy ókili Qaırat Nurtaımen kezdesip, áńgimelesti.

Balalar «Baıqońyrǵa» jasalǵan tanymdyq baǵdarlamanyń sharyqtaý shegine aınalǵan starttan alǵan tamasha áserlerimen bólisti.

«Bul saıahat – biz úshin shyn máninde zor syılyq. Jańa jeńisterge, bilimge, qazaqstandyq ǵaryshtyq tehnologııalardy, eń aldymen «Baıqońyr» ǵarysh aılaǵyn damytýǵa yntalandyrý», - dedi Almaty qalasynan kelgen 11-synyp oqýshysy, «Jer jáne Ǵarysh týraly ǵylym» respýblıkalyq ǵylymı jobalar baıqaýynyń jeńimpazy Kamılıa Jumabaeva.

Spýtnıkter toby bar «Soıýz 2.1b» zymyran-tasyǵyshy búgin, 9 tamyzda Nur-Sultan ýaqyty boıynsha saǵat 11:52-de ushyryldy. Barlyq ǵarysh apparattary maqsatty orbıtaǵa shyǵaryldy.