Qazaqstandyq oqýshylar AQSh-ta ótken robototehnıka chempıonatynda júldeger atandy

ASTANA. QazAqparat – Qaraǵandy oblysynyń «Murager» mamandandyrylǵan mektep-ınternaty jáne Shymkent qalasyndaǵy NZM oqýshylary US Open FIRST LEGO League halyqaralyq chempıonatynda qola medal jeńip aldy, dep habarlaıdy QazAqparat.

Oqý-aǵartý mınıstrligi baspasóz qyzmetiniń málimetinshe, chempıonatqa álemniń 20 elinen 700-den astam oqýshy qatysqan. Shymkenttik «Clutch» toby Innovation Project Award nomınatsııasynda úzdik úshtikke enip, qola júldege ıe boldy. Olar jel generatory men kún panelderinen alynatyn elektr energııany saqtaýǵa múmkindik beretin ınnovatsııalyq joba usynǵan bolatyn. Jel elektr stantsııasyn daıyndaǵan qaraǵandylyq «JelToqSun» komandasy el tarıhynda alǵash ret jarystyń Champions Award basty júldesiniń 3-ornyna qol jetkizdi.

«Biz chempıonatqa jarty jyldan astam ýaqyt daıyndaldyq. Úsh kúndik jarys biz úshin óte qyzyqty boldy, óıtkeni myqty qarsylastar keldi. Alǵashynda qobaljyǵanmen ishki qorqynyshty jeńip, óz qabiletimizdi kórsete aldyq. Biz robottar oıynynda kóshbasshylar qatarynda boldyq. Innovatsııalyq jobany tanystyryp, ózimizdiń uıymshyldyǵymyzdy kórsete bildik», – deıdi qatysýshylardyń biri Akbar Ermekov.

Jarys arasynda qazaqstandyq oqýshylar MIT, Boston University jáne Harvard sekildi bedeldi oqý oryndarynyń ınjenerlik fakýltetterine baryp, professorlarmen jeke tanysty. Olardyń pikirin tyńdap, óz tájirıbelerine qajet keńes aldy.

Esterińizge sala keteıik, eki komanda da Oqý-aǵartý mınıstrliginiń qoldaýymen jyl basynda USTEM Robotics qoǵamdyq qory uıymdastyrǵan FIRST Central Asia Ortalyq Azııa oıyndarynda halyqaralyq chempıonatqa joldama alǵan bolatyn.