Qazaqstandyq mýltserıaldar AQSh, Latyn Amerıkasy elderinde kórsetiledi

NUR-SULTAN. QazAqparat – Qazaqstandyq mýltserıaldar endi Amerıka qurlyǵynda kórsetiledi. Bul týraly «Balapan» arnasynyń dırektory Maqpal Jumabaı áleýmettik jelidegi paraqshasynda aıtty, dep habarlaıdy QazAqparat tilshisi.

«Aldaǵy ýaqytta «Balapan» arnasynyń 5 anımatsııalyq jobasy AQSh-ta kabeldik arnalar, al Latyn Amerıkasy elderinde VOD jáne onlaın-kanaldar arqyly kórsetiledi. Endi «Tynymsyz shójeler», «Sábı», «Erkeler», «Shahmat patshalyǵy», «Pyraqtar» jobalaryn atalǵan elderde aǵylshyn, ıspan jáne portýgal tilderinde kórý múmkindigi bar. Kelisimshart AQSh-tyń jelilik jáne spýtnıktik habar taratý qyzmetin júzege asyratyn «Olympusat» kompanııasymen jasaldy», - dedi M. Jumabaı.

Sonymen qatar, ol «Balapan»-nyń anımatsııalyq jobalary Reseıdegi №1 onlaın-kınoteatr sanalatyn IVI.RU platformasyna júktelgenin jetkizdi.

«Endi «Kúlki izdegen Kúnekeı», «Sábı», «Erkeler» mýltserıaldaryn atalǵan platformadan tamashalaýǵa bolady. Aıta ketý kerek, IVI.RU platformasynyń kontenti bir aıda 50 mıllıonǵa jýyq qaralym jınaıdy», - dep tolyqtyrdy ol.