Qazaqstandyq mergender túngi oq atýlarda barlyq pozıtsııalar boıynsha ozyq shyqty (FOTO)

ASTANA. QazAqparat - «Mergen shebi» baıqaýynyń birinshi kezeńindegi jeke synaqta qazaqstandyq komanda barlyq oq atý túrinen úzdik shyqty.

Bul týraly QR Qorǵanys mınıstrliginiń baspasóz qyzmetinen habarlady.

Bizdiń mergender birdeı eń úzdik ýaqytty kórsete otyryp, barlyq nysanany dál kózdedi. Álemniń 12 eli arasynan túngi saıysta dáldep atýdan sheberlerin anyqtaýda jeńiske jetken bizdiń áskerı qyzmetshiler taǵy bir márte óz kásibı deńgeıin is júzinde tanytty.

Baıqaýda sheberligi men dene shydamdylyǵyn synaǵandar Qytaı, Reseı, Venesýela, Qyrǵyzstan, Belarýs, Zımbabve, Úndistan, Iran, Mońǵolııa, Grekııa jáne Armenııa mergenderi. Qatysýshylarǵa shabýyl jasaýǵa úsh nysana berildi: ara qashyqtyǵy 200-250 jáne 300-400 metrdi bolatyn «Keýde músini», sondaı-aq, «Oqshasharlyq eseptop». Bul nysanany 500-600 metr qashyqtyqta turyp atý kerek bolatyn. Saıysqa qatysýshylar Dragýnov - SVD-S mergen myltyǵynan atys júrgizdi. Túngi jaǵdaıda normatıvterdi tapsyrý túnde kózdeýge arnalǵan «Aselsan» qazaqstandyq ónimin qoldaný arqyly oryndaldy.

Atalǵan «Mergen shebi» baıqaýy 9 tamyzǵa deıin jalǵasatynyn aıta ketken jón. «Mátibulaq» polıgonyndaǵy Otar 40-shy áskerı bazasynda dál qazirgi ýaqytta qyzý ótip jatqan armııa oıyndaryn barlyq nıet bildirgender  kórýge bolady. Qazaqstan Respýblıkasy Qorǵanys mınıstrliginiń mod.gov.kz resmı  saıtynda kúnde halyqaralyq oıyndardyń tikeleı kórsetilimi júrgizilýde.