Qazaqstandyq metsenattar «Týǵan jerine» 51 mlrd teńge aýdardy
«Sizdiń «Rýhanı jańǵyrý» baǵdarlamańyzda aıtylǵan tapsyrmalaryńyz ekonomıkany jańǵyrtý protsesterine mańyzdy ıdeologııalyq qoldaý kórsetip otyr. Bolashaq qazaqstandyqtardy tárbıeleýde jańa bilim berý saıasaty qalyptasyp keledi», - dedi Baqytjan Saǵyntaev Prezıdenttiń qatysýymen ótken otyrysynda jasaǵan baıandamasynda
Baqytjan Saǵyntaevtyń aıtýyna qaraǵanda, memlekettik tildi latyn álipbıine 2025 jylǵa deıin kezeń-kezeńmen kóshirý boıynsha is-sharalar jospary daıyndalǵan.
«Jańa gýmanıtarlyq bilim» jobasynyń aıasynda 800 ataýdan turatyn oqýlyqtar tizimi ázirlenip, olardyń ishinde álemdegi eń ozyq 17 gýmanıtarlyq baǵyttaǵy kitaptar qazaq tiline aýdarylǵan.
«Týǵan jer» jobasy aıasynda elimizde 700-den astam is-shara atqarylyp, taǵy da 300-den astamy iske asyrylýda. Metsenattardyń esebinen 51 mlrd teńgeden astam demeýshilik kómek alyndy», - dep atap ótti Úkimet basshysy.
Sonymen birge, «Qazaqstannyń kıeli jerleri» jobasy boıynsha jalpyulttyq mańyzy bar 183 jáne jergilikti mańyzy bar 520 nysan anyqtalǵan. Birikken Ulttar Uıymynyń 5 tiline dýblıajdalatyn 4 fılmdi túsirý jumystary júrgizilip jatyr.
«Qazaqstannyń 100 jańa esimi» jobasynyń jeńimpazdary anyqtaldy. Olarmen Siz ótken jyldyń jeltoqsan aıynda kezdestińiz. Tól mádenıetimizdiń ozyq úlgilerin shetelderde tanystyrý úshin Táýelsizdik jyldaryndaǵy ulttyq mádenıetimizdiń eń úzdik jetistikteri tańdap alyndy», - dedi Úkimet basshysy.