Qazaqstandyq mamandar Ózbekstandaǵy turǵyn úılerdiń beriktigin tekseredi
Eń birinshi eksperımentaldy 9 qabatty ǵımarattyń beriktigi tekseriledi. Júrgizilgen synaq qorytyndylary boıynsha turǵyn úıdi "Ózbekstandaǵy qoljetimdi turǵyn úı" memlekettik baǵdarlamasynyń aıasynda úlgilik joba retinde ári qaraı paıdalaný múmkindigi týraly tıisti sheshim qabyldanatyn bolady.
Ózbek áriptestermen qol jetkizilgen kelisimderge sáıkes, satý jáne marketıng jónindegi menedjeri Erkın Alımýhamedov jáne BINOKOR úı qurylysy kombınatynyń bas tehnology Kırıll Týlıaganov "QazQSǴZI" AQ ortalyq ǵylymı-zertteý zerthanasyna jumys babymen keldi. Tashkentten kelgen áriptesterdi vıbrodınamıkalyq mashınanyń jumys isteý qaǵıdasy, synaýlar barysynda alynǵan derekterdi taldaý kezeńderi, sondaı-aq vıbrodınamıkalyq synaýlardyń qorytyndylary boıynsha usynystar daıarlaý protsesi qyzyqtyrdy.
"Tashkent Almaty sııaqty seısmıkalyq aýmaǵy 9-10 ballǵa teń seısmıkalyq qaýipti óńirlerge jatady. Bizde seısmıkalyq qaýipti óńir úshin normatıvtik qujattar ázirlengen, barlyq ǵımarattar solardy eskere otyryp jobalanady, alaıda biz natýralyq synaqtar júrgizbeımiz. Ókinishke oraı, tıisti jabdyqtar joq. Biz naryqqa taldaý júrgizdik jáne natýralyq vıbrodınamıkalyq synaqtardy TMD boıynsha tek Qazaqstanda jáne Reseıde júrgizetini anyqtaldy. Biz QazQSǴZI-ǵa júgingen sebebimiz, ınstıtýttyń seısmıkaǵa tózimdi qurylys salasynda mol tájirıbesi bar. Sondaı-aq, ınstıtýt mamandary Ózbekstanda birneshe ret vıbrodınamıkalyq synaqtar júrgizgen", - dedi BINOKOR temirbeton buıymdary zaýytynyń satý jáne marketıng jónindegi dırektory Erkın Alımýhamedov.
2018 jyldyń qazan aıynda "QazQSǴZI" AQ sarapshylarynan turatyn top V3 tıpti vıbrodınamıkalyq mashınanyń kómegimen konstrýktsııaǵa áseri 9-balldyq jer silkinisine teń bolatyn synaq júrgizedi.