Qazaqstandyq qutqarýshylardy jabdyqtaýǵa 4 mlrd teńge qajet - Qasymov

ASTANA. QazAqparat - Tótenshe jaǵdaılar qyzmetin materıaldyq-tehnıkalyq jabdyqtaýǵa 4 mlrd teńge qajet. Bul týraly búgin Úkimet otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat.

«Keshe Asqar Uzaqbaıulynyń (QR Premer-Mınıstriniń birinshi orynbasary - avt) tóraǵalyǵymen azamattyq qorǵaý bólimshelerin materıaldyq-tehnıkalyq jabdyqtaý máselesi týraly keńes ótti. Negizi bul másele biraz jyldan beri qarjynyń azdyǵynan sheshilmeı kele jatyr. Búgingi kúni qutqarý qyzmetterin tehnıkalyq qamtamasyz etý 30 paıyzdan aspaıdy», - dedi ol.

Sonymen qatar mınıstr Shyǵys Qazaqstan, Soltústik Qazaqstan, Qostanaı oblystary, Astana qalasy bıýdjetterinen atalǵan baǵytqa qarajat  óte az bólinetindigin basa aıtty.

«Dál osy kezde bizge 4 mlrd teńgeden astam qarjy kerek. Osyǵan qatysty tıisti esepter men negizdemeler daıyndaldy», - dedi Qalmuhanbet Qasymov.

Aıta keteıik, ótken Úkimet otyrysynda Shyǵys Qazaqstan oblysynyń ákimi Danıal Ahmetov óńirde sý tasqynymen kúreske qajetti qural-jabdyqtar jetispeıtindigin aıtqan bolatyn. 

Al osy máselege qatysty Úkimet basshysy Baqytjan Saǵyntaevtyń naqty jaýabyna sydyrtpa jaýap bergen Іshki ister mınıstriniń birinshi orynbasary Janat Súleımenov sóz estip qalǵan edi.