Qazaqstandyq qutqarýshylar «Hazar-2017» jattyǵýlaryna qatysty
22:35, 03 Qarasha 2017
BAKÝ. QazAqparat - Bakýde Kaspıı mańy elderiniń qutqarý bólimsheleriniń «Hazar-2017» birlesken jattyǵýlary ótýde, oǵan QR ІІM TJ komıtetiniń qutqarý bólimderi qatysyp jatyr, dep habarlaıdy Ázerbaıjandaǵy «QazAqparat» HAA menshikti tilshisi.
«Bul jattyǵýlar ártúrli tótenshe jaǵdaılardy, sonyń ishinde sýdaǵy jáne tehnogendik sıpattaǵy oqys oqıǵalardy joıý boıynsha Kaspıı mańy elderi, Qazaqstan, Ázerbaıjan, Reseı, Túrikmenstan jáne Iran arasyndaǵy yntymaqtastyq aıasynda júzege asyrylýda. Bıylǵy oqý-jattyǵýlar Bakýde ótip jatyr. Qazaqstan oqý-jattyǵýda quramynda 15 qutqarýshysy bar jedel topty jáne 3 tehnıka birligin usyndy», - dedi QR ІІM TJK basqarma bastyǵy Rýstambek Amrın.
«Qazaqstan aýmaǵynda mundaı jattyǵýlardy ótkizý máselesi de qarastyrylýda. Ekinshi ret bolyp jatqan jattyǵý buǵan deıin Astrahanda ótkizilgen edi», - dedi Amrın.