Qazaqstandyq qutqarýshylar Gazıanteptiń ortalyǵynda izdestirý jumystaryna kiristi
Búgin tańerteń Qazaqstannan 41 adam - qutqarýshylar men medıtsına qyzmetkerleri zilzala saldaryn joıýǵa kómektesý úshin Túrkııaǵa attandy.
TJM qutqarýshylarynyń ıeliginde qutqarýshy qural-jabdyqtar: gıdravlıkalyq jáne pnevmatıkalyq jabdyqtar, gıdravlıkalyq domkrattar, pnevmodomkrattar, perforatorlar, jaryqtandyrý quraldary, palatkalar, spýtnıktik termınal, karkasty modýl, avtotehnıka bar.
Top qajetti jabdyqtarmen de, qutqarý jumystaryn júrgizýde kóp jyldyq tájirıbesi bar qutqarýshylarmen de jabdyqtalǵan.
Tıisti tapsyrmany Qazaqstan Prezıdenti Qasym-Jomart Toqaev berdi. Jasaq quramynda Qazaqstan TJM qutqarýshylary, kınologııalyq esepter jáne Apattar medıtsınasy ortalyǵynyń medıtsına qyzmetkerleri bar.
Prezıdent Qasym-Jomart Toqaev Túrkııa Prezıdenti Rejep Taııp Erdoǵanmen telefon arqyly sóılesip, qaıǵyra kóńil aıtty. Prezıdent Túrkııanyń zardap shekken aýdandaryndaǵy izdestirý-qutqarý jumystaryna kómektesý úshin Qazaqstan shuǵyl túrde qutqarýshylar men dárigerler jiberetinin, sondaı-aq baýyrlas elge gýmanıtarlyq kómek kórsetýge daıyn ekenin jetkizdi.
Túrkııadaǵy jer silkinisterinen zardap shekkender men qaza bolǵandardyń tiziminde Qazaqstan azamattary joq.
Búgin Túrkııadaǵy 19 qazaqstandyq stýdent elge qaıtady.