Qazaqstandyq kovıd pasporttar shetelde moıyndala ma

NUR-SULTAN. QazAqparat - Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı shetelde qazaqstandyq vaktsınalaý pasportynyń ózektiligine qatysty suraqqa jaýap berdi, dep habarlaıdy QazAqparat tilshisi.

«Bul másele qazirgi kezde shetelde talqylanyp jatyr. Qozǵalysty shekteý boıynsha álemde naqty bekitilgen normatıvtik qujattar joq. Sondyqtan bul másele qarastyrylýda», - dedi mınıstr Ortalyq kommýnıkatsııalar qyzmetinde.

Osy oraıda ol bul baǵytta elimizde atqarylyp jatqan jumystarǵa toqtaldy.

«Qazaqstanda ózimizdiń aqparattyq júıeni ázirledik. Qazir árbir azamatta ekpeniń eki dozasyn alǵannan keıin, vaktsınalaýdyń elektrondy pasporty berilýde. Eger halyqaralyq zańnamaǵa ózgeris engizilse, biz ıntegratsııaǵa ázirmiz. Bul turǵyda bizdiń aqparattyq júıeler halyqaralyq basqa da júıelermen ıntegratsııaǵa daıyn bolady. Qazirgi kezde álem elderi tıisti talaptardy qoıyp otyrǵan joq», - dedi A. Tsoı.