Qazaqstandyq qos boksshy álem chempıonatyn jeńispen bastady

ASTANA. QazAqparat – Ózbekstan astanasy Tashkent qalasynda ótip jatqan bokstan erler arasyndaǵy álem chempıonatyn Talǵat Syrymbetov pen Aıbek Oralbaı jeńispen bastady, dep habarlaıdy QazAqparat tilshisi.

Dúnıejúzilik dodaǵa alǵash ret qatysyp otyrǵan 22 jastaǵy Talǵat Syrymbetov 60 kelige deıingi salmaqta taılandtyq Sakda Rýamthammen judyryqtasty.

Talǵat úsh raýnd boıy shabýyldap, tóreshilerdiń biraýyzdan sheshimimen jeńiske jetti.

T.Syrymbetov 1/16 fınalda ótken jylǵy Azııa chempıony, ıordanııalyq Mohammed Abý-Djadjehpen rıngke shyǵady.

Aıbek Oralbaı 92 kelige deıingi salmaqta 2019 jylǵy álem chempıonatynyń qola júldegeri, bolgarııalyq Radoslav Pantaleevpen sheberlik baıqasty.

Aıbek birinshi raýndta-aq qarsylasyn nokdaýnǵa jiberdi. Qazylar esebi – 5:0.

A.Oralbaıdyń kelesi qarsylasy da osal emes. Ol 1/16 fınalda ótken jylǵy álem chempıonatynyń kúmis júldegeri, ıtalııalyq Azız Abbes Mýhııdınmen kezdesedi.

Eske sala keteıik, budan buryn álem chempıonatynda qazaqstandyq boksshylardyń alǵashqy qarsylastary anyqtalǵanyn jazǵan bolatynbyz.