Qazaqstandyq konkıshiler Beıjińde jattyǵýǵa kiristi

NUR-SULTAN. QazAqparat - Búgin Beıjińde Qazaqstandyq konkıshiler Olımpıada oıyndary aldyndaǵy jattyǵýlaryn bastady, dep habarlaıdy QazAqparat tilshisi.

Qazaqstan Ulttyq olımpıdalyq komıteti málim etkendeı, sportshylar Olımpıadada jarystar ótetin Ulttyq konkı tebý stadıonynda jattyǵyp jatyr.

Olımpıadada konkımen júgirýden Qazaqstan namysyn Nadejda Morozova, Ekaterına Aıdova, Dmıtrıı Morozov, Ivan Arjanıkov jáne Denıs Kýzın qorǵaıdy.

Erler arasynda Denıs Kýzın men Ivan Arjanıkov ekeýi de 1000 metrge jarysýdan synǵa túsedi. Sondaı-aq Arjanıkov 500 metrge, Dmıtrıı Morozov 1500 metri men mass-starttan óz baqtaryn synap kóredi.

Áıelder arasyndaǵy básekede Nadejda Morozova 1000, 1500, 3000 metrge júgirýmen mass-starttan el namysyn qorǵasa, Ekaterına Aıdova 500, 1000 jáne 1500 metrde júgirýden synǵa túsedi.

Esterińizge sala keteıik, osyǵan deıin short-trekten ulttyq qurma músheleri Olımpıada oıyndary aldyndaǵy jattyǵýyn bastaǵany týraly jazǵan bolatynbyz.

Aıta keteıik, XXIV qysqy Olımpıada oıyndaryna Qazaqstan quramasynan barlyǵy 34 sportshy qatysady, olar 87 joldama jeńip aldy.

Búginde olar olımpıadalyq qalashyqtarǵa ornalasty. Qazaqstandyqtar shańǵy jarysy, frıstaıl akrobatıka jáne mogýl, konkımen júgirý, short-trek, bıatlon, taý shańǵysy, tuǵyrdan sekirý, shańǵy qossaıysy sııaqty 8 sport túrinen synǵa túsedi.

Oıyndardy «Qazaqstan», «Qazsport», «Habar» jáne «El arna» telearnalarynan tikeleı efırden kórýge bolady.

Tórtjyldyq dodanyń ashylý saltanaty Nur-Sultan ýaqytymen 4 aqpan kúni, saǵat 17:55-te bastalady.