Qazaqstandyq kompanııalar Ózbekstanda geologııalyq barlaý júrgizýdi josparlap otyr

TAShKENT. QazAqparat - Geologııalyq barlaý jumystarymen aınalysatyn qazaqstandyq kompanııalar Ózbekstanda jumys isteýge ázir. Bul týraly «Aurora Minerals Group» Qazaqstan-Aýstralııa kompanııasynyń bas dırektory Qaısar Qojamuratov «Ýzgeoınvest-2017» H halyqaralyq konferentsııasynda málim etti, dep habarlaıdy «QazAqparat» HAA menshikti tilshisi.

«Ózbekstanda ken oryndary kóp bolǵandyqtan, geologııalyq barlaý turǵysynan únemi qyzyǵýshylyq týdyryp keledi. Respýblıkada bolyp jatqan sońǵy oqıǵalarǵa baılanysty eldiń áleýetti múmkindigin zertteý úshin osynda keldik. Bolashaqta Ózbekstan naryǵyna kirip, áleýetti klıentterge óz qyzmetterimizdi usynbaqpyz», - dep atap ótti ol.

Budan bólek, «Aurora Minerals Group» kompanııasynyń basshysy atap ótkendeı, onyń kompanııasynyń klıentterin asyl, tústi metalldar men polımetalldar qyzyqtyrady.

Qazirgi tańda ÓR úkimetiniń sheshimimen sheteldik ınvestorlarǵa 29 ken oshaqtary men 111 qatty paıdaly qazbalardyń ken oryndary usynylyp jatyr.