Qazaqstandyq kompanııa Qyrǵyzstandaǵy kenishti ıgerýge $430 mln ınvestıtsııalaǵan

BІShKEK. QazAqparat - Qazaqstandyq KAZ Minerals Bozymchak kompanııasy Qyrǵyzstandaǵy Bozymchak jezdi-altyn ken oshaǵyna 10 jylda 430 mln dollar quıǵan, dep habarlaıdy QazAqparattyń menshikti tilshisi.

Bul týraly Qazaqstannyń Qyrǵyzstandaǵy Tótenshe jáne Ókiletti elshisi Kárim Kókirekbaevtyń ken-baıytý kombınatyna sapary kezinde kompanııanyń bas dırektory Іlııas Tólekeev aıtty.

Qyrǵyz Respýblıkasynyń ońtústik-batysynda ornalasqan Bozymchak - KAZ Minerals kompanııasynyń Qazaqstannan tysqary jerde ornalasqan alǵashqy jobasy.

«2007 jyldan bastap jobaǵa 430 mln dollar ınvestıtsııalandy. Qajetti ınfraqurylym júrgizilip, Qyrǵyz Respýblıkasynyń azamattary úshin 1200 jumys orny ashyldy. Osy kezeń aralyǵynda kompanııa memleket bıýdjetine 2,8 mlrd som (41 mln 176 myń dollar) kóleminde salyq tólegen», - dedi kezdesýde Іlııas Tólekeev.