Qazaqstandyq komandalar ArMI-2016-ǵa qatysý úshin Reseıge attandy - QR QM
Olar elimizdiń namysyn aldaǵy oıyndardyń «Rembat», «Qarý sheberi», «Avtobrondy tankti tehnıka sheberleri» atty úsh baıqaýda qorǵaıtyn bolady. Atalǵan baıqaýlarda birqatar synnan ótýge týra keledi. «Rembat» - bul tehnıka men qarý-jaraqqa qyzmet kórsetý jáne jóndeý boıynsha sheberhanalardyń saıysy. Munda birinshi orynǵa kúsh synasýda qatysýshylarǵa jeke jarysta, atys daıarlyǵynda, áskerı-sporttyq kezeń men aralas estafetada ózderiniń barlyq sheberlikterin pash etý qajet.
«Qarý sheberi» - qarý-jaraq jóndeý vzvodtarynyń saıysy. Komandalardy úsh kezeń kútip tur. Atap aıtqanda, 122-mm D-30A tartylatyn gaýbıtsany jóndeý, 23-mm ZÝ-23 zenıttik qurylǵysyn jóndeý, qarý bıatlony jáne sheshýshi estafeta. «Avtobrondy tankti tehnıka sheberleri» - avtomobıl júrgizýshileriniń saıysy. Áskerı júrgizýshiler shekteýli ótýler boıynsha júrgizýde, kedergilerdi, qorshaýlar men sý bógetterin eńserýde, shekteýli ótýler boıynsha jartylaı tirkemelerdi tartýda, sondaı-aq, sońǵy komandalyq estafetada synalady. Atalǵan baıqaýlarǵa qatysý úshin belgilengen komandalar áskerı bólimder, óńirlik qolbasshylyqtar men Qurlyq áskerleri deńgeıinde irikteýden ótkenderin aıta ketken jón. Olardyń quramyndaǵylar - úzdik júrgizýshiler, tehnıkter men sheberler.
Jalpy alǵanda, osy jyly Qazaqstannyń Qarýly Kúshteri Armııa halyqaralyq oıyndarynyń 23 baıqaýynyń 21-ine qatysady. Osylaısha, komandalar barlyq oıyn túrlerinde usynylady. Alǵashqy ret óner kórseteıin dep otyrǵan áskerı qyzmetshilerge úlken úmit artylyp otyr. Tankishilerdiń, áskerı ushqyshtar men teńizshilerdiń atalmysh saıystarǵa qatysýdaǵy mol tájirıbeleri «Tank bıatlony», «Avıadarts», «Teńiz kýbogy» baıqaýlarynda júldeli oryndarǵa úmittenýge múmkindik beredi.