Qazaqstandyq kólikterdi shetelge eksporttaý kólemi 23 paıyzǵa artty
17:11, 21 Shilde 2022
NUR-SULTAN. QazAqparat - Bıyl jarty jyl ishinde elimizde 51 myńnan astam avtotehnıka shyǵaryldy (2021 jyly - 39 482), dep habarlaıdy QazAqparat QR Saýda jáne ıntegratsııa mınıstrliginiń baspasóz qyzmetine silteme jasap.
Avtomobıl, tirkeme men jartylaı tirkemeler óndirisi 30,6%-ǵa artty. Mashına jasaýdaǵy sala úlesi 37,5%-ǵa ósip otyr.
2022 jyldyń birinshi jartyjyldyǵynda Ózbekstan, Reseı, Belarýs jáne Qyrǵyzstanǵa eksport 23% artyp, 4 557 avtomobılge deıin ósken.
Jalpy somasy 53,9 mlrd teńgeden asty.
Bıyl 13 shildede baǵdarlamaǵa qatysýshy bankter 90 mlrd teńge somasyna 11 825 ótinimdi maquldady.
Maquldanǵan ótinimder boıynsha qazirdiń ózinde 7 852 avtomobıl shyǵaryldy.
2022 jyldyń birinshi jartyjyldyǵynyń qorytyndysy boıynsha eń tanymal brendterdiń bestigine (eksportty qosa alǵanda) Chevrolet, Hyundai, Kia, Lada jáne JAC avtokóligi kiredi.