Qazaqstandyq klýbtardyń eýrokýboktaǵy qarymta kezdesýlerine tóreshiler belgilendi

ASTANA. QazAqparat - Qazaqstandyq «Astana» men «Tobyl» komandalarynyń eýrokýbok oıyndaryndaǵy qarymta kezdesýlerine tóreshiler belgilendi, dep habarlaıdy QazAqparat tilshisi.

UEFA Chempıondar lıgasy birinshi irikteý satysynda elordalyq «Astana» 19 shildede syrt alańda Grýzııanyń «Dınamo Tbılısı» komandasymen qarymta oıyn ótkizedi.

Kezdesýge anglııalyq Stıýart Ettýell bas tóreshi retinde bekitilgen. Oǵan otandastary Stıýart Bert pen Nıl Devıs kómekshilik jasaıdy. Qosalqy tóreshi de - anglııalyq Djon Brýks.

Eki komanda arasyndaǵy alǵashqy kezdesýde 1:1 esebi tirkeldi.

Sondaı-aq, Konferentsııa lıgasy birinshi irikteý satysynda synǵa túsip jatqan «Tobyl» 20 shildede syrt alańda Fınlıandııanyń «Honka» klýbymen sheberlik baıqasady.

Kezdesýde Lazar Lýkıch bas tóreshi qyzmetin atqarady. Oǵan otandastary Dragan Bogıchevıch pen Boıan Banovıch kómekshilik jasaıdy. Qosalqy tóreshi de sol eldiń ókili Nıkola Djordjevıch.

Alǵashqy oıynda «Tobyl» qarsylasynan 2:1 esebimen basym tústi.