Qazaqstandyq kınotýyndylar Frantsııada kórsetildi
«Álemdegi zamanaýı qazaqstandyq mádenıet» atty arnaıy halyqaralyq joba Qazaqstannyń úshinshi modernızatsııasynyń maqsattary men perspektıvalaryn jáne qazaq halqynyń dástúrli mádenı murasyn jáne Qazaqstannyń zamanaýı óneriniń úzdik jetistikterin álemdik qoǵamdastyqqa tanystyrady.
«Anaǵa aparar jol» fılmi ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Kartınanyń rejısseri - Aqan Sataev. Kınotýyndyny frantsýz kórermenderine ananyń rólin somdaǵan aktrısa Altynaı Nógerbek tanystyrdy.
«Frantsııa astanasynyń tórinde elimizdi, mádenıetimiz ben dástúrimizdi tanystyrǵanyma óte qýanyshtymyn. Kórermender fılmdi úlken qoshametpen qarsy aldy. Qazaqstanda dúnıe esigin ashyp, qazaq bolyp týǵanyma, qazaq aktrısasy atanyp, osyndaı aýqymdy fılmde ról buıyrǵanyna taǵdyryma sheksiz rızamyn», - dedi aktrısa.
Atalǵan fılm 38-shi Halyqaralyq Máskeý kınofestıvalinde jáne «Eýrazııalyq kópir» atty festıvalge qatysyp, Bas júldeni, sonymen qatar aktrısa Altynaı Nógerbek «Úzdik áıel adam róli» nomınatsııasynda jeńiske jetti. Odan bólek, bul týyndy bıyl Qazaqstan kınosynshylar assotsıatsııasy uıymdastyrǵan «Synshylar tańdaýy» júldesinde úsh birdeı júldeni ıemdendi. Atap aıtsaq, «Eń úzdik aktrısa» - Altynaı Nógerbek jáne «Ekinshi plandaǵy úzdik aktrısa» Arýjan Jazylbekova dep tanyldy. Al «Fılmge jazylǵan úzdik mýzyka» nomınatsııasyn atalmysh fılmniń kompozıtorlary Álim Zaırov pen Roman Vıshnevskıı bólisti. Odan bólek, kınotýyndy Bishkekte ótken «Aq ilbiris» atty VI ulttyq kınojúldesinde Ortalyq Azııanyń úzdik fılmi atandy. Al 2017 jyly maýsym aıynda Nıý-Iorkte ótken 5-shi eýrazııalyq kınofestıvalde tarıhı kınotýyndy «Úzdik kórkem fılm» júldesin aldy. Sonymen qatar, fılmniń Bas prodıýseri Álııa Nazarbaeva «Kıno álemindegi eýrazııalyq áıelder» júldesimen, al kartınada ana rólin somdaǵan aktrısa Altynaı Nógerbek «Úzdik aktrısa» júldesimen marapattalǵan.
Sonymen qatar is-shara barysynda QR Mádenıet jáne sport mınıstrligi tapsyrysy boıynsha «SAQ-dala» JShS túsirgen «Qazaq eli» anımatsııalyq fılmi kórsetiledi. Jasalýynda 2D jáne 3D-tehnologııalar paıdalanylǵan atalmysh týyndy bolashaq handar - Jánibek pen Kereıdiń balalyq shaǵy men eseıý jyldary týraly baıandaıdy. Bul anımatsııalyq fılmdi kórermenderge rejısserdiń ózi tanystyrdy.
«Kórsetilimnen keıin kórermender alǵysyn bildirip, patrıottyq tárbıe beretin, otansúıgishtikke baýlıtyn fılmder qaı elde bolmasyn úlken mánge ıe ekenin aıtty. Sondyqtan da, osyndaı tarıhı týndylar kóp bolýy kerek dep oılaımyn», - dedi rejısser.
«Qazaq eli» anımatsııalyq fılmi ótken jyly mamyr aıynda kópshilik nazaryna usynylyp, kınoteatrlardan kórsetilgen bolatyn. Atalmysh fılm Kaır qalasynda ótken H Halyqaralyq anımatsııalyq fılmderdiń forýmyna qatysyp «Eń úzdik tolyqmetrajdy fılm» júldesine ıe boldy. Sonymen qatar, kartınanyń kompozıtory Rýslan Shynyqulov jáne fılmniń áýenin jazýǵa qatysqan mýzykant Janbolat Ádilov qurmet dıplomdarymen marapattaldy. Aıta ketetin jaıt, anımatsııalyq kınotýyndynyń halyqaralyq kınofestıvalderde kórsetilip, keńinen nasıhattalý jumystaryn Sh.Aımanov atyndaǵy «Qazaqfılm» AQ júzege asyrady.