Qazaqstandyq kıbersportshylar chempıondyq úshin baq synaıdy
Aqmola oblysynyń «Visit Aqmola» týrıstik aqparattyq ortalyǵynyń málimeti boıynsha, jarys 6 sáýir kúni Şýche qalasyndaǵy Olımpıadaǵa daıarlyq ortalyǵy aýmaǵynda ótedi.
«Sharany «Qazaq Cybersport Federation» respýblıkalyq qoǵamdyq birlestigi men Aqmola oblysynyń dene shynyqtyrý jáne sport basqarmasy birlesip uıymdastyrmaq. Al «Qazaqtelekom» AQ tehnıkalyq qoldaý kórsetedi. Chempıonat otandyq komandalar arasynda eki kezeńmen ótkiziledi. Birinshi kezeńi 23 naýryzda chempıonattyń resmı saıtynda onlaın rejimde ótkizilse, fınaldyq oıyn Şýche qalasyndaǵy Olımpıadaǵa daıarlyq ortalyǵynda jalǵasyn tabady. Fınalda 4 komanda Counter-Strike-tiń 2 tártibi (Global Offensive jáne Dota 2) boıynsha kezdesedi. Jeńimpazdar aqshalaı marapatqa jáne demeýshilerdiń, onyń biri - ASUS kompanııasy shyǵaratyn syılyqqa ıe bolady», - dep atap ótti vedomstvodan.
«Kıbersportty damytý boıynsha qoǵamdyq jumys turaqty túrde qoldaýdy jáne #QCF barlyq komandanyń qyzyǵýshylyǵyn qajet etedi. Biz udaıy jobaǵa jańa áriptester men jaqtastarymyzdyń tartylýyn qamtamasyz etýge umtylamyz. Búgingi jáne keleshek kıbersportshylardyń damýyna jaǵdaı jasaý úshin, jastardy qoldaý baǵytynda bul bastamanyń qundylyǵyn túsindirgen mańyzdy», dep jazdy Feısbýktegi parqashasynda «Qazaqtelekom» AQ basqarma basshysy jáne «Qazaq Cybersport Federation» RQB prezıdenti Qýanyshbek Esekeev.
Onyń sózinshe, osy kıbersporttyq sharany uıymdastyryp, ótkizýge birinshi bolyp Aqmola oblysynyń ákimdigi qyzyǵýshylyq tanytqan. Kelisizder nátıjesinde anyqtalǵandaı chempıonat jańa formatta ótkiziledi.
Aıta keteıik, kıbersport - bul álemdik ındýstrııada qarqyndy damyp kele jatqan oıyn. Qazirdiń ózinde Eýropa, Amerıka, Reseı, Ýkraına jáne ózge kóptegen elderde jaqsy damyǵan.
«Qazaqstanda kıbersport endi ǵana qolǵa alyna bastady. Degenmen, qazirgi kezde qazaqstandaǵy kıbersportshylardyń tabysy 130 eldiń ishinde 35-orynda. Elimizdegi kıbersportshylarǵa tigiletin syılyq kólemi 1,5 mıllıon AQSh dollaryn quraıdy. Al Qazaqstandaǵy kásibı geımerlerdiń sany 400-den asady. Ótken jyldyń 25 maýsymynan bastap kıbersport Qazaqstandaǵy resmı sport túri dep tanyldy. Elimizde kıbersport týrnırlerin uıymdastyrý arqyly elimizge týrısterdi tartýǵa bolady», - dep atap ótti Aqmola oblysynyń «Visit Aqmola» týrıstik aqparattyq ortalyǵynan.
«Osy múmkindikti paıdalan otyryp, týrıster men kıbersportty súıer qaýymdy jarysqa qatysýǵa shaqyramyn. Biz Býrabaı kýrortynda osyndaı týrnırlerdi turaqty túrde ótkizip turýdy sheshtik. Bul qazirgi kezde tanymal jańa sport túrleriniń biri sanalady. Jaqynda ǵana resmı sport túri bolyp tanyldy. Bul sport túrinen kóptegen jarystar uıymdastyrylýda jáne qzaqstandyq kıbersportshylar joǵary jetistikterge qol jetkizýde. Osyndaı jarystardy ótkizý arqyly Býrabaı kýrortyna nazar aýdarylatyny sózsiz», - dep QazAqparatpen pikirin bólisti Aqmola oblysy ákiminiń orynbasary Marat Iǵalıev.
Qazaqstandyq kıbersportshy qol jetkizgen iri jeńis - «Gambit» komandasynyń Polshada ótken Counter-Strike Global Offensive jarysy. Onda úsh qazaqstandyq týrnır chempıony ataǵyn jáne 500 myń dollar aqshany jeńip aldy.