Qazaqstandyq keden 3,8 mlrd. teńgege qozǵalǵan qylmystyq is boıynsha taýarlar men valıýtalardy tárkiledi
«Keden isi salasyndaǵy jedel jaǵdaılar men anyqtalǵan qylmys faktilerin taldaý qylmystyń 70%-nan astamy ekonomıkalyq kontrabandaǵa (QR QK 209-baby) jatatyndyǵyn, qylmystyń 6%-ǵa jýyǵy aınalystan alynǵan zattardyń kontrabandasymen (QR QK 250-baby) baılanysty, al 4% - salyqtardy tóleýden jaltarýdan (QR QK 214-baby) ekenin kórsetti»,-deıdi QM Kedendik baqylaý komıteti Kontrabandaǵa qarsy kúres jónindegi basqarma bastyǵy Narıman Músilimov .
Basqarma bastyǵynyń aıtýynsha, aǵymdaǵy jyldyń birinshijartysynda qazaqstandyq kedenshiler 433 qylmystyq is qozǵady, bul aldyńǵy jylǵy birinshi jartyjyldyqtyń kórsetkishterinen eki ese kóp.
Qylmystyq is boıynsha tárkilengen taýarlar men valıýtalardyń somasy 3,8 mlrd. teńgeni qurady.
Keden isi salasyndaǵy qylmysqa qarsy kúreste negizgi kúsh ekonomıkalyq qylmysqa qarsy áreketti júrgizý. Aǵymdaǵy jyly keden organynyń quqyq qorǵaý bólimsheleri jalǵan deklaratsııalaý, qujattardy almastyrý jáne «taýarlardy búrkemeleýdi» paıdalanýmen baılanysty «jalǵan tranzıt» jáne «sur ımport» sııaqty birqatar iri arnalardy anyqtady.
Alýshy Qazaqstanda tirkelgen, qaıyrymdylyq uıymdarynyń biri bolyp tabylatyn gýmanıtarlyq júkterdiń túrlerimen halyq tutynatyn taýarlardy kontrabandalyq ákelý shemasynyń aldyn aldy.
Osy faktini, ózge de qoǵamdyq qorlar men uıymdardyń qylmystyq shemalaryn paıdalaný múmkindigin anyqtaý úshin Kedendik baqylaý komıtetinde arnaıy top quryldy, tekserý sharalary júrgizilýde, qorytyndylary boıynsha buzýshylarǵa tıisti sharalar qoldanylatyn bolady.
Sondaı-aq, Qazaqstanda birinshi jartyjyldyqtyń ishinde jalpy somasy 1,3 mlrd. teńgege zańsyz ákelingen 323 avtokólik quraldary anyqtaldy, 144 qylmystyq is qozǵaldy.
«2013 jylǵy 6 aı ishinde valıýtalardy zańsyz alyp ótý faktileri boıynsha 15 qylmystyq is qozǵaldy, tárkilengen valıýtalardyń jalpy balamaly somasy 86 mln. teńgeni quraıdy. Jeke tulǵalarmen aqsha qarajattaryn ótkizýdiń negizgi baǵyttary burynǵysha QHR, BAE, Túrkııa, Qyrǵyzstan, Ózbekstan jáne basqa elder bolýda.
Esirtki quraldary men basqa tyıym salynǵan zattardyń zańsyz aınalymyna qarsy áreket boıynsha birinshi jartyjyldyqta keden organdary 32 qylmystyq is qozǵady, zańsyz aınalymnan 100 kelige jýyq túrli esirtki quraldary tárkilendi, onyń ishinde 21 keliden astamy - geroın»,-deıdi QM Kedendik baqylaý komıteti Kontrabandaǵa qarsy kúres jónindegi basqarma bastyǵy.