Qazaqstandyq kaskaderler Netflix túsiretin Ámir Temir jaıly fılmde trıýkter qoıady

ASTANA. QazAqparat - Ámir Temirdiń ómiri týraly tolyqmetrajdy fılmniń túsirilimi Qazaqstan men Ózbekstanda ótedi. Trıýkterdi qoıýshy - Nomad Stunts tobynyń negizin qalaýshy, QR eńbek sińirgen qaıratkeri, kaskaderlerge arnalǵan «Oskar» ıegeri Jaıdarbek Kúnǵojınov, dep habarlaıdy QazAqparat.

Atalmysh fılm avtorlarynyń Almatyǵa sapary barysynda osyndaı kelisim jasaldy.

– Biz úshin bul óte mańyzdy joba,- dep atap ótti Nomad Stunts halyqaralyq kaskaderler tobynyń jetekshisi, QR eńbek sińirgen qaıratkeri Jaıdarbek Kúnǵojınov. – Biz buǵan deıin de Netflix strımıng servısine daıyndalǵan jobalardyń túsirilimine qatysqanbyz, biraq bul joly tobymyzdyń mamandaryna alǵashqy ret fılmdegi barlyq ekshenniń jaýapkershiligi tolyqtaı júktelip otyr. Sheteldik akterlerdiń de daıyndyǵy tobymyzdyń Esiktegi bazasynda ótedi. Fılm jasaýshylary bizdiń bar múmkindigimizben jiti tanysty. Atap aıtsaq, topqa arnalǵan qonaq úı, gımnastıkalyq zal, levada jáne at qoralardy aldyn ala kórdi jáne kóńilderinen shyqty.

Tarıhı fılmniń jelisi Ámir Temirdiń myqty kóshbasshy jáne daryndy áskerı strateg retinde qalyptasý kezeńin beıneleıdi.

Daıyndyq 2023 jyldyń qańtar-naýryz aılaryna, al túsirilim sáýir-mamyrǵa josparlanǵan.

– Men Jaıdarbektiń eńbegin joǵary baǵalaımyn, ásirese «Mońǵol» fılmindegi álemdi tańqaldyrǵan ekshennen keıin úlken jankúıerine aınaldym,- dedi rejısser Djeıkob Shvarts. - Nomad Stunts tobynyń oryndaýyndaǵy trıýkter, jáı ǵana trıýkter jıyntyǵy emes, olardyń jumysy qandaı da bir oqıǵany tolyqtaı ashatyn óz aldyna bólek storıtellıng dep aıtsa bolady. Biz kaskaderlerdiń daıyndyǵyna qatystyq jáne odan alǵan áserimizden áli aryla almaı júrmiz. Endigi kezekte Ámir Temirdiń ómirin batys kórermenine birigip, qyzyqty etip jetkizemiz dep úmittenemiz. Batysqa beımálim mádenıetter jaıly oqıǵalar qazirgi tańda erekshe qyzyǵýshylyq týǵyzyp otyr. Sondyqtan bizdiń týyndymyz Batys pen Shyǵys aýdıtorııalary arasynda kópir bolǵanyn qalaımyn.

Eksterer túsirilimderdiń basym bóligi Qazaqstanda, al ınterer túsirilimder Ózbekstanda ótedi dep josparlanǵan.

Fılm jasaýshylary bul jobaǵa qazaqstandyq mamandardy tartýdy kózdep otyr.

ıAǵnı operatorlar, kostıým sýretshileri, ákimshilik qyzmetkerler kóptep jumyldyrylmaq.

– Biz Qazaqstanǵa sheteldik prodakshn-kompanııalardy tartý úshin uzaq eńbektendik,- dedi Jaıdarbek Kúnǵojınov. – Ókinishke qaraı, 2014 jyly túsirilgen «Marko Polo» serıalynyń birinshi maýsymynan keıin úlken stýdııalar elimizge múlde kelmedi desek bolady. Qazir jaǵdaıdyń jaqsy jaǵyna ózgerip jatqanyna qýanyshtymyz. Bul tobymyzdyń kásibıligi men abyroıynyń arqasynda dep bilemin. Bizben jumys istegileri keledi, senim artady, osylaı elimizge tartylyp jatyr. Árıne, bul - úlken jaýapkershilik.

Aıta keteıik, bul - Nomad Stunts tobynyń fılmografııasyndaǵy Netflix úshin daıyndalǵan úshinshi joba bolaıyn dep tur.

Buǵan deıin qazaqstandyq kaskaderler «Marko Polo» jáne «Korolge hat» serıaldarynyń túsirilimine qatysty.

Olar sondaı-aq HBO men Apple TV+ servısteri jáne Disney, Universal stýdııalarymen jumys jasaıdy.

Vıdeodan alynǵan kadr instagram.com/nomadstunts/