Qazaqstandyq kásiporyndar myńǵa jýyq dári-dármek shyǵarady

NUR-SULTAN. QazAqparat - Qazaqstanda 89 farmatsevtıkalyq kásiporyn dárilik zattar jáne medıtsınalyq buıymdar shyǵarady. Bul týraly Ortalyq kommýnıkatsııalar qyzmetinde ótken dárilik zattardy, medıtsınalyq ónimderdi jáne ókpeni jasandy jeldetý apparattaryn otandyq óndirý týraly brıfıngide aıtyldy, dep habarlaıdy QazAqparat tilshisi.

«Memleketimizde farmatsevtıkalyq ónerkásibindegi 89 kásiporyn dárilik zattar jáne medıtsınalyq buıymdar óndirýdi júzege asyrady. Onyń ishinde dárilik zattardy óndirý boıynsha 33, medıtsınalyq maqsattaǵy buıymdar 41 jáne medıtsınalyq tehnıka óndirisi boıynsha 15 kásiporyn jumys isteıdi. Birinshi, dárilik zattar óndirisi boıynsha dárilik zattardyń negizgi óndirisi Almaty, Shymkent qalasynda jáne Almaty oblysynda ornalasqan on kásiporyn, sondaı-aq Qaraǵandy oblysy men Aqtóbe oblysynda bir kásiporynnan ornalasqan. Bul kásiporyndar myńǵa jýyq dári-dármek shyǵarady. Olardyń ishinde jedel respıratorlyq aýrýlardy jáne olardyń asqynýlaryn emdeýge baǵyttalǵan, vırýsqa qarsy, qabynýǵa qarsy dárilik preparattar men antıbıotıkter bar», - deıdi QR Indýstrııa jáne ınfraqurylymdyq damý vıtse-mınıstri Amanııaz Erjanov.

Onyń aıtýynsha, dene qyzýyn túsiretin jáne vırýsqa qarsy preparattardyń negizgi óndirýshileri - «Nobel AFF» AQ, Abdi Ibrahim Global Pharm JShS.

«Olardyń shyǵaratyn dári-dármekteri: palıtramıtsın. Onyń quramy paratsetamol, tanfleks, rıvırın preparattary sııaqty. «Farm Aqtóbe» grıppovır, jótelge qarsy sıroptardy shyǵarady. «VIVA FARM» paratsetamol, boksgrıpal jáne basqa dárilerdi shyǵarady», - deıdi ol.