Qazaqstandyq kásiporyn Ózbekstan men Belarýske mata eksporttamaq

ASTANA. QazAqparat - Qazaqstandyq kásiporyn Belarýs pen Ózbekstanǵa mata jetkizýdi josparlaýda, dep habarlaıdy QazAqparat tilshisi.

«Bıyl Ózbekstan jáne Belarýs elderimen, atap aıtqanda bıznes-qaýymdastyqtarymen tabysty jumys istedik. Ózbekstan Respýblıkasynyń kúshtik qurylymdaryna arnap mata shyǵarýdy josparlap otyrmyz. Belarýske tolyq óńdelmegen mata jiberemiz. Mundaı matany olar Ózbekstan men Qytaıdan satyp alyp kelgen eken. Al Ońtústik Qazaqstanda otandyq maqtadan dál sondaı materıal jasaıtyn kásiporyn bar, ondaǵy ónimderdi Ózbekstan men Belarýske tasymaldaı alamyz», - dedi «Jasampaz» konsortsıýmy atqarý keńesiniń tóraǵasy Gúlmıra Ýahıtova Astanada ótken «Jeńil ónerkásip jetistikteri - 2017» atty jıynda.

Onyń aıtýynsha, konsortsıým qorǵanys salasyndaǵy tapsyrystardan bólek, ózge de jobalardy júzege asyryp keledi.

«Bizdiń elimizde otandyq óndirýshiler ónim óndirip, óz paıdasyn tıgize alatyn baǵyttar kóp. Jer qoınaýyn paıdalanýshylarǵa arnaıy kıim jetkizip, iri ulttyq kompanııalar úshin fırmalyq kıim tikkimiz keledi», - dep atap ótti G.Ýahıtova.

Sonymen birge,  atalǵan kásiporyn qarapaıym turǵyndar úshin ónim ázirleýge de basa mán berip, eksportqa taýar shyǵarýdy kózdep otyr.