Qazaqstandyq kásiporyn Airbus pen Rolls-Royce-qa ónimderin eksporttaıdy

NUR-SULTAN. QazAqparat – QR Indýstrııa jáne ınfraqurylymdyq damý vıtse-mınıstri Marat Qarabaev álemdik arenada tabysty jumys istep jatqan qazaqstandyq kompanııalardy atady, dep habarlaıdy QazAqparat tilshisi.

«Mashına jasaý salasyn damytýdy jol kartasy aıasynda óndiris kólemi 5 ese ósip, 2020 jyldyń qorytyndysy boıynsha 1,8 trln teńgege jetti. Salaǵa tartylǵan ınvestıtsııalar 3 esege ósip, 63 mlrd teńge boldy. 2021 jyldyń 7 aıynda naqty kólem ındeksi 123% - ǵa jetti. Aýyl sharýashylyǵy mashınalaryn jasaý sektory 3 ese, temir jol mashınalaryn jasaý 45% jáne avtomobıl jasaý 35% ósim kórsetti. Bul – eń joǵary kórsetkishter», - dedi ol Qazaqstan mashına jasaýshylarynyń ІH forýmynda.

Marat Qarabaevtyń aıtýyna qaraǵanda, salada eksport aıtarlyqtaı ósim kórsetip, 642 mln dollardyń ónimi syrtqa satylǵan.

«Eksporttalatyn mashına jasaý ónimderiniń nomenklatýrasy keńeıtildi jáne qazir bizdiń kásiporyndar dástúrli ótkizý naryqtarynan basqa Ázerbaıjan, Tájikstan, BAÁ, Túrikmenstan jáne Qytaı sııaqty elderge eksporttaıdy.

Jahandyq qosymsha qun jasaý tizbegine tabysty kirigýdiń jarqyn mysaly retinde «Sılýmın-Vostok» JShS-niń frantsııalyq «Shnaıder elektrık» kompanııasymen birlesip elektr taratý apparatýrasyn óndirýdi qolǵa alǵanyn aıtýǵa bolady. Óskemen tıtan-magnıı kombınaty koreıalyq «POSKO» kásipornymen birlesip tıtan quımalar men buıymdaryn «Eırbas», «Rolls Roıs» kompanııalaryna eksporttaýda. Almatydaǵy jeldetkish shyǵaratyn zaýytyn koreıalyq LG transulttyq korporatsııasyna ónim daıyndap otyr», - dedi vıtse-mınıstr.